Bamboo technology, itantandudo ti SP ti La Union

April 28, 2018 Headlines

PUGO, LA UNION – Kas panangsaranay iti agri-tourism development strategy ti probinsia, insayangkat ti Sangguniang Panlalawigan (SP) nga idadaulo ni Vice-Governor Aureo Augusto Q. Nisce ti maika-95 a regular session idi Abril 23, 2018 iti BAMBUsaPINAS (BsaP) Farm, Ambalite, Pugo, La Union.
Siraragsak met a nangsangaili kaniada ti agassawa a “Most Outstanding Entrepinoy 2018” awardee, Dale ken Betty Ramos, makinkukua iti Gwenysa Bamboo Enterprise ken mangar-aramat iti Activated Bamboo Charcoal (ABC) technology iti probinsia.
Ti ABC ket binigbig ti BsaP kas maysa nga iconic product a mangipakpakita nga addaan ti nabagas ken agtultuloy a merkado para kadagiti produkto manipud iti kawayan.
Ti BsaP ket maysa a korporasion nga inrugi idi 2010 da Rene E. Cristobal, Jose Z. Osias, ken Romualdo L. Sta. Ana. Gandat daytoy a tuladen ti “bamboo miracle” iti China a nakipasetan ni Sta. Ana kas maysa a trustee ti International Network of Bamboo and Rattan (INBAR).
Maysa pay kadagiti kalkalikaguman ti BasP a maiposision ti kawayan iti agro-industry isu a naipatakder ti Pugo Bamboo Center (PBC) kas maysa a demonstration farm, primary processing center ken hands-on training facility iti panangpatanor ken panangproseso iti kawayan iti amianan a Luzon. Kangrunaan kadagiti serbisio nga ipapaayda ti giant bamboo seedlings production, panangaramid iti bamboo charcoals ken bamboo charcoal activation, ken produkto manipud iti ABC kas iti ABC powder ken deodorizer/dehumidifier, bamboo stick/pole a pang-dekorasion, bamboo vinegar a mausar kas ganagan, natural soap ken cosmetics.
Binuya ti SP ti panagaramid iti uging ken suka kabayatan nga ipalpalawag ni Dale Ramos dagiti proseso a maar-aramat. Kinunana a maymayat ti uging manipud kawayan ngem dadduma a kaykayo gapu ta nasayaat daytoy iti aglawlaw ken addaan pay ti mineral content kas iti potassium, calcium, iron ken sodium.
Mangisaysayangkat ti BsaP iti hands-on training iti bamboo rehabilitation, propagation ken charcoal making kadagiti amin nga intersado, banag a supsuportaran ti SP babaen ti Resolution No. 023-2018 a mangkidkiddaw iti municipal/city/provincial agriculturists iti probinsia a makipaset iti nasao a panagsanay. RMABALLESTEROS, GPC-SP / ABN