Banggaan, sunod- sunod sa Baguio
LUNGSOD NG BAGUIO – Iniulat ng Traffic Enforcement Unit ng Baguio City Police Office Station 7ang sunod-sunod na banggaan ng ilang sasakyan sa noong May 23, 2017 (Martes).
Nasagi ang isang Toyota Corolla Altis Sedan ng isang Isuzu cargo truck sa kahabaan ng Yandoc Street sa tapat ng Imarflex Sales Office and Service Center ng Golden Crest Building dakong 11:10 ng umaga.
Ang sedan na minamaneho ni Efren Julian Gamboa, isang negosyante, ay nagmula sa direksyon ng Yandoc Street papunta sa direksyon ng Legarda Road. Habang iniiwasan ang mga nakapark na sasakyan sa gilid ng kalsada ay nagkasalpulan sila ng cargo truck na minamameho ni Alberto Gayodna Guzman Jr., isang truck driver, na mula rin sa parehong direksyon na bumagtas sa kaliwang banda ng kotse.
Ang kotse ay nagtamo ng sira sa kaliwang puwetan nito habang ang cargo truck naman ay nagtamo ng sira sa kanang harapan nito.
Kotse, binangga at tinakbuhan
Personal na dumulog sa tanggapan ng BCPO Station 7 si Romanco Alquero Baluyot, 33 anyos, upang ireport at maipa-blotter sa pulis ang nangyari sa kanyang sasakyan habang ito ay nakapark sa isang parking building sa Upper Mabini Street, Baguio City.
Aniya, iniwan niya ang kanyang Honda Civic Sedan na may plakang WEW 911 sa parking area. Mga bandang alas-dose y media ng tanghali, ay nabangga ang kanyang kotse sa kaliwang harapan ng pintuan nito. Ang nakabangga umano ay isang Mitsubishi Montero Wagon na may conduction sticker number NB-0165 na minaneho ng hindi pa nakikilalang driver na umalis agad.
Nakunan umano ng CCTV camera na nasa parking area ang nasabing insidente.
Banggaan ng taxi at motorsiklo, isa sugatan
Sugatan ang driver ng isang motorsiklo matapos itong mabangga ng isang taxi, 2:20pm, sa kahabaan ng Upper General Luna Road, Baguio City, sa may Junction ng Notre Dame De Chartres Hospital.
Nangyari ang insidente nang sinubukang sumingit sa kasalungat na linya ng Kawasaki Rouser Motorcycle na minamaneho ni Michael Bas-il Quitlong, 31-anyos, isang electrician, dahil sobrang traffic sa nasabing lugar. Sa pagkakataong ito ay nag-U-turn ang Isuzu Crosswing Wagon taxi, minamaneho ni Rex Dangpas, 44-anyos, matapos itong nagbaba ng pasahero, at para magpick-up muli ng pasaherong kumaway sa kabilang banda ng kalsada.
Nagtamo ng injuries ang driver ng motorsiklo na dinala naman ng mismong driver ng taxi sa Baguio General Hospital and Medical Center para sa medical treatment matapos ang insidente. Parehong nagtamo ng sira ang motorsiklo at taxi. Adrian Trinidad, UC Intern
