Barangay ti ili iti Ilocos Sur naipasidong iti ‘Extreme ECQ’

March 28, 2020 Headlines

MAGSINGAL, Ilocos Sur – Impasidong ni Governor Ryan Luis Singson iti intero a barangay ti San Vicente daytoy nga ili iti ‘extreme enhanced community quarantine’ nangrugi iti Martes, Marso 24 kas panagannad kontra panagwaras iti makakapatay a coronavirus disease 2019 (COVID-19).
Impakaammo daytoy ni Governor Singson iti maysa a press conference idi rabii ti Lunes idiay Provincial Library kalpasan nga ma-confine ti maysa a pasiente sadiay Ilocos Sur Provincial HospitalGabriela Silang idiay Siudad ti Vigan nga naikonsidera a maysa nga ‘highly probable case’ ti COVID-19 bayat nga iti resulta ti laboratory test daytoy ket maur-uray.
Sigun iti sarita nga imparuar iti provincial government, iti pasiente ket maysa a 34-anos nga lalaki ken driver iti Maria de Leon Bus Line.
Naggapo iti nasao nga pasiente rabii ti Marso 14 sadiay Manila ken bimmaba idiay Magsingal, Ilocos Sur 4:00 ti parbangon ti Marso 15. Marso 16 naaddaan iti panaguyek ken panagsakit ti ulo iti pasiente nga nagtuloy ken kimmaro.
Idi Marso 22 naggurigor isuna iti nangato unay ken marigatan nga aganges. Umuna nga naipasina daytoy sadiay Ilocos Sur District Hospital-Magsingal.
Gapu iti kinakaro iti seniales ken sintomas ken resulta iti umuna a chest X-ray, nayakar ti pasiente sadiay Ilocos Sur Provincial Hospital Gabriela Silang nga naaramid ti CT-scan iti barukongna
agsapa iti Lunes.
Rimmuar iti CT-scan ti bilateral pneumonia suggestive of classic COVID19, moderate in degree by British Society of Thoracic Imaging (BSTI) guidelines.
Maibasar iti opisial a pannarita iti Philippine College of Radiology, iti CT-scan ket naidokumentar a mas sensitibo ngem iti gene sequencing.
Iti sidong ti ‘extreme enhanced community quarantine’ ket maiparit ti asinoman nga sumrek ken rumuar iti nasao nga barangay, maipatungpal iti ‘total lockdown’ tapno maksayan iti peggad ti pannakaiwaras iti sakit iti pangangsan kadagiti sabali a komunidad.
Nainget a mabilinan amin nga umili iti Barangay San Vicente nga agtalinaedda iti home quarantine wenno panagikuarentinas ti pagtaenganda.
Impasigurado ni Governor Singson nga ited iti provincial government iti nasken a suporta kadakuada bayat iti panakuarentinasda iti babbalayda.
Maibasar iti kaudian nga report manipud Inter-Agency Task Force for the Management of Emerging and Re-Emerging Infectious Diseases (IATF-EREID) para ti COVID-19, agtaltalinaed nga awanan COVID-19 iti Ilocos Sur bayatna nga adda 11 persons under investigation ken 11,197 persons under monitoring.
Kabayatanna, idagadag dagiti awtoridad iti salun-at kadagiti umili nga agtalinaedda iti pagtaenganda, aramiden dagiti pamusmusan a panangsaluad kas iti kanayon nga panagugas iti ima nga aramaten iti sabon, kaluban iti bibig ken agong nu aguyek wenno agbang-es, ken taginayonen iti social distancing wenno panagsisina a pisikal.
AMB-PIA-IS/PMCJr.-ABN