Basura iti ospital ti LU, nainget a mabantayan

August 13, 2017 Headlines

SIUDAD TI SAN FERNANDO, LA UNION – Naiget a maimanehar ti basura manipud kadagiti ospital ti probinsia kalpasan a napirmaan ti kasuratan iti nagbaetan ti probinsial a gobierno ti La Union (PGLU), Department of Health (DOH), ken Cleanway Environmental Management Solutions Inc. idi Agosto 8, 2017 sadiay Diego Silang Hall, Provincial Capitol.
Pakairamanan ti Memorandum of Agreement on Hazardous Hospital Waste Management ti maitutop a panangiggem, panagkolektar, panangibunag, panangagas, pannakaidulin ken panangibelleng kadagiti health care waste. Pakaibilangan daytoy ti general waste, infectious, pathological, sharps, pharmaceutical, genotoxic ken chemical wastes a nangato ti linaonna nga heavy metals, pressurized containers ken radioactive waste.
Ti nakuna a MOA ket kas panangtungpal iti bilin ti Department of Environment of Natural Resources (DENR) a mangala iti akreditado a kompanya a mangkolektar, mangibunag ken mangagas kadagiti hazardous hospital wastes.
Ni Vice Governor Aureo Augusto Q. Nisce ti nangibagi kenni Gov. Francisco Emmanuel “Pacoy” R. Ortega III iti paset ti PGLU, Provincial Health Officer Dr. Hector Beñas iti DOH ken ni Chief Operating Officer Gerard R. Hernandez para iti Cleanway.
Kas paset ti kasuratan, ti Cleanway ti mangted ti 15 inggana 20 bins a maikabil iti La Union Medical Center ken sabali pay a district hospitals ti probinsia a pakairamanan ti Balaoan, Bacnotan, Naguilian, Caba ken Rosario. Makolektar dagiti bins kada bulan. Dagiti waste materials ket maipasidong iti treatment process a Hydroclave Steam Sterilization, dagiti residue ti maidulin iti maysa a sanitary landfill facility.
Ti MOA on Hazardous Hospital Waste Management ket nabukel babaen ti Sangguniang Panlalawigan Resolution No. 274-2017. Hana Josua C. Martinez, PITO-LU / ABN