Circumferential Road, lubhang kailangan na

July 9, 2017 Editorial

Sa pag-usad ng mga taon ay palubha na ng palubha ang kalagayan ng trapiko, saan man lugar na kung saan nagkukumpol-kumpol ang karamihan ng tao- sa mga mauunlad o sentro ng kalakalan na siyudad, bayan o probinsiya. Isa ang lungsod ng Baguio na maituturing na may malubhang problema sa trapiko at ngayon ay unti-unti na ring nararamdaman ng karatig-bayan ng La Trinidad.
Matagal ng panahon na  nagtutulungan ang Baguio at La Trinidad sa larangan ng turismo at kalakalan lalo na sa pangangailan ng mga gulay ng lungsod. Dahil magkaratig lamang ang dalawa, at ang lungsod ng Baguio lamang ang tanging daan ng mga mangangalakal ng gulay patungo sa Manila at mga ibang probinsiya na pinakamalapit at madali ang biyahe kaya nakakatipid sila sa mga gastusin at malaki ang  kita. Ito ay noon, nang maluwag pa ang daloy ng trapiko at wala pang mga ordinansa sa mga daan.
Subalit nabahala na ang mga vegetable dealers dahil sa inilabas na truck ban ordinance 2017 ng Baguio City noong Pebrero 2017 at ipinatupad kamakailan lamang. Sa ilalim ng truck ban ay may takdang oras na ang pagdaan ng mga truck mula 6:00 ng umaga hanggang 9:00 ng umaga at 4:00 ng hapon hanggang 9:00 ng gabi.
Umalma ang mga mangangalakal ng gulay at sinabing lubhang malulugi na sila dahil hindi na nila maibibiyahe sa takdang oras ang kanilang produkto at maaaring mabulok na o mabawasan na ang kalidad ng mga gulay. May punto rin sila dahil nasa 70 hanggang 80 porsiyento ng pangangailangan ng buong bansa ay galing sa probinsiya ng Benguet… kung tutuusin ay malaki ang magiging epekto nito.
Hindi rin masisisi ang lungsod ng Baguio sa nasabing ordinansa dahil kailangan ding maibsan at matugunan ang problema sa trapiko. Ayon sa hepe ng traffic enforcement office ng lungsod ay may positibong epekto ang truck ban sa trapiko. Sa kabila nito ay humihingi ang mga mangangalakal ng gulay ng exemption sa ban upang hindi rin lubhang maapektuhan ang kanilang delivery at ang magiging epekto nito sa ekonomiya at industriya ng gulay sa probinsiya ng Benguet (maaalala niyo ang truck ban sa Manila?).
Marahil ay mahirap bigyan ng solusyon ang trapiko dahil  mabilis ang pagdami ng sasakyan at tao subalit kumikitid naman ang mga daan. Dito na sana lubhang kailangan ang proyektong ‘Circumferential Road’ na magdadalawang dekada na yatang nakatengga. Malaking tulong ito lalo na sa truck deliveries dahil hindi na sila dadaan sa lungsod ng Baguio at mapapabilis pa ang biyahe. Pero nasaan na ang proyektong ito? Naumpisahan na nga ito kaya sana mabigyan na ito ng pansin ng dalawang congressman ng Benguet at Baguio upang tingnan ang posibleng magagawa dito upang mapakinabangan na ito at huwag lamang masira ang nagawa ng daan sa paglipas ng panahon at sa kaiisip ng paraan sa isyu ng truck ban. PMCJr.