Cruise ship, kukuha ng mga trabahador sa Pangasinan

October 9, 2017 Provincial

LINGAYEN, PANGASINAN – Darating sa Pangasinan sa Oktubre 13-14 ang mga kinatawan ng ikalawang pinakamalaking cruise ship sa buong mundo na Royal Caribbean Cruises Ltd. upang mag-recruit ng mga trabahador.
Ang dalawang araw na recruitment ay isasagawa ng RCCL Crew Management Inc. sa Provincial Employment Services Office (PESO) sa Capitol Complex, Lingayen.
Sinabi ni PESO Chief Alex F. Ferrer na ang recruitment ng ship crew ay gagawin mula 9am hanggang 9pm sa Oktubre 13 at mula 9am hanggang tanghali sa susunod na araw.
Nasa Pangasinan ang mga opisyal ng RCCL noong nakaraang linggo upang isaayos ang pagre-recruit kay Governor Amado Espino III at sa PESO.
Sinabi ni Ferrer na naghahanap ang kompanya ng mga tao para sa iba’t ibang posisyon: para sa culinary – baker, butcher, Chef De Partie-Baker, Chef De Partie-Butcher, Chef De Partie-Garde Manger, Chef De Partie-Suchie, Commis 1, Head Baker, Pastry Sous Chef, Sushi Cook, Pantry Chef, Pantry Cook at Pastry Cook.
Nangangailangan din sila ng isang lifeguard at isang laundry attendant para sa housekeeping.
Para sa inventory ay kailangan ng kompanya ang assistant hotel, hotel storekeeper, provision storekeeper at technical storekeeper.
Sa marine positions ay: isang 3rd assistant repairman, artistic painter, assistant electrician, assistant refrigerator engineer, filter engine, filter repairman, filter turner, incinerator operator, mechanic, motorman, plumber, repairman, upholsterer, varnisher at wiper.
Sinabi ni Ferrer na ang mga palikanteng walang passport ay maaari ding mag-apply. PNA / ABN