Dadaulo ti La Union SK Federation, nagsapata

June 16, 2018 Headlines

SIUDAD TI SAN FERNANDO, LA UNION – Nagsapata dagiti kabarbaro a dadaulo ti Panlalawigang Pederasyon ng mga Sangguniang Kabataan (PPSK) iti panangiturong ni Gob. Francisco Emmanuel “Pacoy” R. Ortega III kabayatan ti 2018 PPSK Orientation and Elections idi Hunio 11, 2018 iti Diego Silang Hall, Provincial Capitol, City of San Fernando, La Union.
Dimmar-ay dagiti 20 a presidente ti municipal ken city SK Federation a nagpili kadagiti baro nga opisial ti PPSK.
Nabotosan kas presidente ni Alyssa Kristine B. Sibuma manipud Aringay; Mark Anthony A. Ducusin ti City of San Fernando kas bise presidente; Demieliz E. Nudo ti Bauang kas secretary; Ronald Jake O. Rodriguez ti Santol kas treasurer; Joevilyn N. Doctolero ti Sto. Tomas kas auditor; Jaira Manhel M. Gonzales ti Bacnotan kas public relations officer; ken David George A. Almiana ti San Gabriel kas sergeant-at-arms.
Ti eleksion, canvasing ken proclamation ti PPSK ket insayangkat ti Election Committee ken ni Board of Election Supervisors Chairperson Paulino G. Lalata Jr., provincial director ti Department of the Interior and Local Government-La Union Provincial Office.
Amin a nakipaset iti aktibidad ket naadalan maipapan iti legal a basaran, kinabileg ken akem ti PPSK ken dagiti SK Pederasyon Officers, malaksid pay iti internal rules of procedure, session ken meetings, ken quorum.
Natalantan pay ti advocacy iti Federalism ken Bantay Kaagapay Program babaen iti audio visual presentation.
Iti mensahe ni Gobernador Pacoy, inbinglay na ti maipapan ti transformative governance ken core values ti probinsial a gobierno ti La Union.
Ginutugotna dagiti PPSK a surutenda ti nainkalintegan nga aramid iti panangipatungpalda kadagiti akem da.
Ti SK ket nabukel manipud iti Kabataang Barangay a naibangon idi 1975 tapno maikkan dagiti agtutubo ti gundaway a makipaset iti komunidad ken gobierno. CRBUMATAY, PITO LU / ABN