Dating AFP chief, hanga sa mga sundalong Cordilleran

October 29, 2017 Metro BLISTT

Sa kanyang pagbisita sa Philippine Military Academy (PMA) noong Sabado (Oktubre 21), sinabi ni General Eduardo M. Año na lubos siyang humahanga sa katapangan at husay sa pakikipagdigma na ipinakita ng mga sundalong galing sa Cordillera sa katatapos na digmaan sa Marawi City.
Ayon sa heneral, siya ang naging over all team leader ng AFP at PNP sa giyera sa Marawi kaya alam niya ang mga pangyayari. “Ako ay lubos na humahanga sa ipinakitang katapangan at galing ng mga Cordilleran warriors natin. Kung hindi sila ang nasa front line, sila ang namumuno sa operasyon para madaig ang mga terorista,” ani Año.
Ang giyera sa Marawi ay nagsimula noong buwan ng Hunyo ngayong taon nang tangkain ng teroristang ISIS na kontrolin ang naturang siyudad. Umabot sa halos limang buwan o 154 na araw bago idineklara ni Pangulong Rodrigo Duterte na tapos na ang giyera at wala nang labanan.
“Isa sa talagang nagpalaya sa Marawi City ay ang 24 hours na pagbabantay at pag-atake sa mga terrorista. At kabilang dito ang mga warriors natin dito sa Cordillera. Kahit tapos na ang labanan ay mukhang ayaw pa nilang umuwi para tumulong sa pagpapanatili ng kaayusan at katahimikan sa lugar. Parang wala silang kapaguran,” ani Año.
Ayon kay Año, magkahalong saya at lungkot ang kanyang naramdaman sa pagtatapos ng labanan sa Marawi City. Aniya, masaya siya na natapos na pero nakakalungkot din dahil sa maraming nagbuwis ng buhay sa mga sundalo. Ilan ding mga sibilyan ang nadamay at namatay dahil sa giyera.
“Sa mga magulang, asawa at mga kamag-anak ng mga nasawi nating Cordilleran warriors ay ipinapaabot ko po ang aking pakikiramay. At nais ko ding malaman niyo na bayani ang inyong mga anak, asawa at kamag-anak. Saludo ang sambayanang Pilipino lalo na ang AFP. Mananatili silang bayani at patuloy na pasasalamatan ng mga Pilipino ang kanilang sakripisyo at kabayanihan,” paliwanag ni Año.
Si Año ay dumating sa lungsod ng Baguio noong Oktubre 21 para sa kanyang parangal na iginawad sa kanya ng PMA bilang pagpupugay sa pagtatapos niya sa naturang eskwelahan at sa naging kontribusyon niya sa sandatahang lakas. Siya ay kabilang sa PMA “Matikas” class of 1983. Bago siya nagretiro noong Huebes (October 26), siya ang ika-48 na Chief of Staff ng AFP. DIONISIO DENNIS JR. / ABN