Dayta ah ti kalsada, sungkaan!

Opinion Sirmata ken Tagtagainep ni Mang Gusting

Hellooo, hellooo. Naimbag nga oras kadatayo amin kakailian. Addakam manen nga umay maki-abrasa ken makinnistoria kadakayo babaen iti ABN. Naimbag nga oras kadakayo amin nga awan malabsan kailian. Bayat a masursurat daytoy a kolum tayo, nakabayog ti signal #2 iti siudad ti Baguio ngem nupay kasta, pagyamananmi ta kalmado pay laeng ti aglawlaw ngem mapattapatta a dumteng iti parbangon ti Sabado. Ngem, ala sapay la koma iti Apo ta di unay napigsa ken awan ti maipatli manen a biag ken awan ti adu a madadael a sanikua. No panagbabagyo, adu ti madanagan ditoy ayanmi a batug ti langit ta adu ti nagbalay iti bakras ti bantay nga uray ammoda met a delikado.

Wen, kailian, no ditoy ayanmi basta adda pangitugkelan iti adigi a kunada, mabalin a pagbalayanen. Doming mabalin amin a kunada. Isu a no adda ti landslide, agamak da met laeng. Amkenda nga agkurosokos ti bantay kas ti napasamak iti halos maysa a barangay a nargaay ket ginasut ti nagbalin a biktima a no sadino ket nagaburanda iti pitak. Nakaam-amak a panunoten dagitoy no dumteng ti kastoy a tiempo Kayong Angkuan. Ngem kas nakunak, adu latta ti agbalay, ta kasanu met ngamin, uray kalapaw laeng basta malibre iti abang a kunada ken kabukbukodam a balay.

Kas nakunatayo iti napalabas nga isyu tayo, manu a turog laengen Ber month-en. Malanglang-aben ti ayamuom ti paskua. Ket segurado, agsasallupang manen iti tangatang nga ipatokar dagit radio station dagiti kanta a pam-paskua. Ngem, kasanu ngay daytoy Kayong, umayen ti Ber Month ngem adda pay la bagyona. Manu pay ti sumrek iti dayta, adda tayo pay laeng it litra “j”…amangan no paskuanto manen ket adda bagyona. Daytan ti adatna ita. Nagbaliw a talagan ti taray ti panawen. Idi, no dumtengen ti kastoy a bulan manmanun dagitay sumangbay a bagyo. Ngem ita ket kasla mangrugrugi tayo pay laeng.

Malagipko man gayam Kayong Angkuan. Damagek man no kumusta metten dagiti project dita away yo. Adda kadi dagiti maaramid a kamino real nga kalsada? Ta ditoy ayanmi a batug, makapa-siodot a di maawatan ti kasasaad dagiti sigud a sementado ken mabalin pay a kalsada. Agasem inaramid da a sungkaan. Palalu ti kontraktor toy pagpagnaanmi a kalsada nga agturong iti trabaho mi…ginusodgusod da iti pagabut, kasla sungkaan latta ti itsurana, ngem napaliiwmi, agmakabulanen ngem dida met la rugyanen. Awan anay ti aramidyo, asino aya ti akin-proyekto dayta? Asino a kontraktor? Ala, didapay la ibaga ta ibagak ken GC Construction ta isun mangaramid, segurado a pulido ti garaw wenno aramid da, saan a puted-puted. Ania ngay ti pigsa diay semento, awan met ngarud landok a pagsabatanda tapno saan nga agbettak ket aginnadayo diay silpo. Hay naku kayo! Ala metten, a, ibagayon no asino ti kontraktor. Wen gayam, asino kunam kayong ti GC Constructions? Gustilo Cayabcab! Hahahaa.

Ulitenmi, asino kadi ti kontraktor daytoy? Akin proyekto, national wenno city? Ngem segurado met ketdi a city ngem ti diak ammo no naggapuan ti pundo na daytoy? Ay Apo kayo aya no diyo pay la marugyan, dakamatekton no sadino a lugar ditoy siudad ti saleng dayta ibagbagak. Ngem daytoy a banda ket masarakan iti—ay, cut muna. Ta ne, over time ta manen. Agunget ni Apo Thom, hahaha.

Okey ngarud, agsisina tayon ta saantayo met a nagkakapet. Babayo, muahmuah tsuptsup, love you all.