Delivery service, online tutorial inyussuat ti IN youth office

May 10, 2020 Provincial

SIUDAD TI LAOAG – Agsidsiddaaw kayo kadi nu anya’t araramiden dagiti agtutubo ita a panawen? Iti opisina ti agtutubo iti provincial government ti Ilocos Norte, nga isu’t Ilocos Norte Youth Development Office (INYDO), iti pannakisugpon ti Sangguniang Kabataan (SK) iti Ilocos Norte ket indanguluanda iti pannakayussuat iti maysa nga hotline delivery service kadagiti barangay ken online tutorials ken klase bayatna nga naipasidong pay iti probinsia ti
community quarantine gapu iti COVID-19.

Naawagan a kas “Bes, Siakon! At Your Service”, iti nasao a delivery service ket addaan dua a paset. Gapu ta limitado pay iti panaggaraw dagiti umili, inikkan autoridad iti hotline delivery service ken Young Kadiwa Store dagiti agtutubo nga agsirbi kas delivery service provider para kadagiti sangkabalayan iti barangayda nga addaan sueldo para iti rigatda.

Agsirbi met daytoy nga pagpilian dagiti opisial ti SK nga mangibuangay ti sarilida a miniKadiwa store nga addaan tulong ti gobierno ti probinsia.

“Para iti Hotline Delivery Service, manangdan kami iti tallo nga agtutubo kada maysa a barangay iti probinsia nga isuda iti agkolekta, gumatang, ken mangitulod dagiti tagilaku nga kiddaw dagiti sangkabalayan, babaen iti tulong dagiti opisiales ti barangay tapno malimitaran iti pananggaraw dagiti agindeg iti ruar ti barangay.

Dagiti agtutubo nga benepisario ket agubra maysa aldaw sakbay iti Essential Supplies Day (ESD) ken iti ESD mismo, ken masuelduanda iti PhP1,000 kada maysa,” kuna ni INYDO Officer Willie Jake Sib-at.

Adda kabuklan a 1,677 agtutubo ti agbenepisio manipud daytoy a programa.

“Para iti Young Kadiwa Store, inliniami daytoy iti Kadiwa Farmer’s Marketmi ti provincial government. Pabulodanmi dagiti SK Chairman iti tagilaku ken produkto tapno adda mai-displayda kadagiti mini-Kadiwa store iti barangayda,” innayon ni Sib-at.

Kabayatanna, yantangay nga maiparit pay iti rupanrupa a panagklase, usaren ti “SANA OL! Online Tutorial and Classes” iti Facebook kas maysa nga online learning platform nga dagiti topiko kas music, arts, fitness and health, life hacks, survival tips, ken personal hygiene ket madakamat.

Dagiti young professionals nga natangdanan para daytoy nga online program ket mangiprisentar iti maysa a maximum nga tallo a topiko ken mabayadanda iti PhP1,500 tunggal maysa iti klase wenno tutorialsda.

Daytoy nga programa ket mailinia iti agtultuloy nga alternatibo a programa ti gobierno ti probinsia para kadagiti apektado nga agindeg iti COVID-19 pandemic.

MJTAB-PIA-IN/PMCJr.-ABN