Digong at Leni, sweet na ba? Owsss!

April 1, 2017 Daplis Walang Mintis Opinion

Owss at owsss pa rin ang naging reaksiyon ng marami sa mga eksenang nasaksihan kamakailan lalo na noong nagdaos ng ika-72 kaarawan ni Pres. Duterte kung silang dalawa ni VP Leny Robredo ang ating tsitsismisin. Haay naku napakahirap mag-spelling. Napakahirap husgahan ang bawat tinginan, ngitian at marami pang kakuwanan na maaari mong paghuhugutan ng mga tama at maling akala. Napakahirap talagang magsuspetsa, este, manghusga. Sige, bulatlatin natin para mahusgahan din ng madlang pipol:

*********

Una, ayaw ni Pres. Duterte na masama sa impeachment si VP Leny Robredo. Sinabi niya mismo ire, di ba? Kasi raw ay dapat maipagpatuloy nito (Leni) ang kanyang misyon bilang bise presidente ng bansa. Yan ang pagmamalasakit mula kay Digong sa likod nang nabulgar na may video message sa UN si VP Leni kontra sa Extra Judicial Killings (EJK) na diumano ay nagaganap sa administrasyong Duterte. Sabi nga ng marami na napakapait naman ang ginawa ng bise presidente. Napahiya ang buong bansa at nahirapan tuloy ang turismo upang makapanghatak ng mga turista sa ating bansa. Idagdag mo pa raw ang upak nito sa ating ekonomiya o pagnenegosyo. Pero sa likod ng masakit na banat ni VP Leni naging mapang-unawa at nagkaroon pa rin ng pusong mamon si Digong at natunaw yata ang kanyang pusong bato nang sabihing huwag namang isama pa si Leni sa impeachment. O, ha? Say niyo? Nandiyan ang patunay na tao lang si Digong na may puso at damdaming makakaunawa sa tunay na diwa ng pagkakaisa at pagmamalasakitan para sa mas matiwasay na serbisyo sa bayan. Pero sa mga taong iisa ang direksiyon ng utak, wala lang!

*********

Ikalawang eksena, binati ni VP Leni sa kanyang ika-72nd B-day kamakailan. Ang wish: sana ay maipagpapatuloy pa ni Pres. Duterte ang kanyang panunungkulan bilang pangulo para sa bayan. Pahapyaw pa nga ni Leni na “malakas pa si Pangulong Duterte”. At sa kahit maiikling kataga, nabulalas ng bise na dapat nga silang magtulungan para sa bayan dahil sila ang nahalal na pangulo at pangalawang pangulong sandalan ng sambayanan. Napakasarap at napakatamis pakinggan, di ba? At ang kasunod naman ay ang eksenang inimbitahan ni Digong si VP Leni (kasama ang pamilya) para sa isang dinner o gabihan. Di man sinabi ng pangulo kung kailan, yan ay hinihimay na ng kampo-Duterte upang maisakatuparan. At ang maganda hindi naman nagpa-hindi ang bise presidente. Na ang ibig sabihin, tinatanggap niya ang alok ng pangulo. Ang rason ay upang makapag-usap sila ng masinsinan para sa mga programa ng administrasyon para sa bayan. Mariakusina, sa eksena pa lang na yan, marami na ang napa-ihi, este napangiti at natuwa, di ba? Nakikita nating malayong mas matibay ang kinabukasan ng ating bansa kung nagkakaisa ang ating matataas na opisyal ng bansa lalo na kina Pangulong Digong at VP Leni Robredo. Tanong: kailan kaya ang dinner at saan? Ano-ano kaya ang mga pag-uusapan? At pagkatapos niyan, ano pa kaya ang mga eksenang maasahan?

*********

Ikatlong eksena: diyan na diumano ay mga sulsol upang barahan ang mga damdaming nilalagnat na sa pagkakaisa. Upang hindi magkalapit ang damdaming Digong-Leni. Upang sila’y papag-awayin pa. Tanong: bakit hindi daw tumitigil si Sen. Trillanes na gatungan ang mga eksena upang magkalayo ang dalawa (Digong at Leni)? Ano daw ba talaga ang gustong mangyari ni Senador? Ang palakihin pa ang lamat at hidwaan sa pagitan nina Digong at Leni? At pagkatapos ano ang plano nito? Ano daw ba talaga ang papel na gustong gampanan ni Senador Trillanes? Makakuha ng papel? Baka papel de liha daw ang bagsak! Sus ginoo, sana matapos ang mga sigalot at tensiyon para makausad na ang bansa, pasulong at hindi paatras. Abangan ang mga susunod pang mga eksena. Adios mi amor, ciao, mabalos!