DISIPLINA-ISANG MUNTING PAGSUNOD TUNGO SA MULING PAGBANGON

September 17, 2022 Editorial

Sa gitna ng mga haka-haka at diskusyon sa pagpapanatili ng pagsusuot ng facemask sa Pilipinas ay inaprubahan na ni Pangulong Ferdinand “Bongbong” Marcos Jr. ang rekomendasyon na tapusin na ang sapilitang pagsusuot ng facemask sa labas ng bahay sa buong bansa, higit dalawang taon matapos itong ipatupad sa kasagsagan ng pandemya sa coronavirus.

Sa bisa ng Executive Order No. 3 na nilagdaan ng Pangulo noong Setyembre 12, 2022 ay pinapayagan na ang boluntaryong pagsusuot ng facemask sa labas, partikular sa mga open space at hindi masikip na may magandang bentilasyon. Gayunpaman, ang mga hindi pa lubos na nabakunahan laban sa Covid-19, ang mga senior citizen, at mga may medikal na kundisyon ay mahigpit na hinihikayat na magsuot ng mask at sundin ang physical distancing sa lahat ng panahon.

Magpapatuloy pa rin ang pagsusuot ng facemask sa loob ng pribado at pampublikong mga establisimiyento, kabilang ang pampublikong transportasyon sa lupa, himpapawid, o karagatan at sa labas
kung saan hindi maaaring panatilihin ang physical distancing. Ang Pilipinas at Myanmar ay ang mga huling bansa sa Timog-silangang Asya na ipinapatupad pa rin ang sapilitang pagsusuot ng facemask sa labas ng bahay.

Sa isangpag-aaral ay ipinakita na ang pagpapatigil ng mandatory requirement sa ibang bansa ay hindi nagbunga ng isang nakakaalarmang pagtaas sa pagkahawa kung ang tao ay patuloy na nag-iingat. Nauna nang nagluwag sa pagsusuot ng facemask ang mga bansang Singapore, Malaysia, Thailand, Vietnam, at Indonesia na hindi naman nakapagtala ng mga pagtaas ng mga kaso ng Covid-19.

Malugod na tinanggap ng ilang mga pangunahing sektor na malaki ang ambag sa nagpapaandar ng ating ekonomiya ang balitang ito gaya ng turismo, transportasyon, mga kumpanya at manggagawa at pati ng mga maliliit na negosyante. Ang ibang mga ekonomniya sa Asia, Europe, at North America kung saan
tinanggal ang mahigpit na mga health protocol ay nagresulta sa mas paborableng mga kondisyon, pagtaas sa mga bumubisitang turista, at mabilis na pagbawi ng kani-kanilang turismo at negosyo.

Ang mga pangunahing merkado ng bansa sa Asia gaya ng Japan, South Korea, Hongkong at iba pa ay nag-umpisa ng magluwag ng kanilang pagpapatupad ng pagsusuot ng facemask. Sa kabila ng kautusan, kung ang Department of Health ang masusunod ay mas gusto nilang panatilihin ang pagsusuot ng facemask sa labas. Subalit sa mga pagpupulong sa IATF kung saan ilang mga ebidensiya ang inilahad ng ibang mga sektor ay nakipagkompromiso ang kagawaran at sumang-ayon sa panukalang pagtanggal sa
sapilitang pagsusuot ng facemask sa labas sa kondisyon na ang pinaluwag na panuntunan ay hindi isasama ang mga senior citizen, mag may kundisyong medikal, mga bata, at mga pasahero ng pampunlikong transportasyon.

Isinaalang-alang din ang malapit ng maabot na ng Pilipinas ang “wall of immunity” na nasa 6% na lamang ang natitira. Mahigit 72 milyong Pilipino na ang nakakumpleto ng bakuna kontra sa Covid-19, ngunit
18 milyon pa lamang ang naturukan ng booster shots. Mula nang mag-umpisa ang pandemya noong 2020 ay kinumpirma ang 3.9 milyon mga kaso ng Covid-19, na may mahigit 62,000 namatay.

Kailangan ng humabol ang Pilipinas sa karera upang makabawi mula sa pandemya at ang pagluluwag ng mga restriksiyon ay isang malaking bagay subalit mahirap na hakbang dahil hindi pa lubos na napapawi ang banta ng Covid-19 at mga iba pang sakit. Sa mga bansang lubos na tinamaan ng paglaganap ng Covid-19 sa Southeast Asia, ipinatupad ng Pilipinas ang isa sa “pinakamatagal na lockdown” sa buong mundo na naging sanhi ng pinakamalalang pagbagsak ng ekonomiya sa loob ng ilag dekada at nagpalala sa kahirapan, gutom at kawalan ng trabaho.

Kaya nga kailangan na nating bumangon at kahit paano ay ipagpatuloy ang normal na takbo ng buhay, matuto na at sanaying kasama na natin ang panganib ng sakit na pinapanatili natin ang pagsunod pa
rin sa minimum health protocols gaya ng physical distancing at paghuhugas ng mga kamay, maging responsableng mamamayan na may disiplina – isang munting pagsunod tungo sa lubos na muling pagbangon.