Drug test sa estudyante sa high school, suportado ni Domogan

August 20, 2017 Metro BLISTT

Inihayag ni Mayor Mauricio Domogan ang buong suporta nito sa kamakailang mandato ng kagawaran sa edukasyon para sa pagpapatupad ng random drug test sa mga estudyante ng junior at senior high sa pampublikong paaralan upang maiiwas ang kabataan sa pagkadawit sa masamang mga bisyo.
Hiniling ng mayor sa mga kinauukulang tanggapan ng gobyerno na paglaanan ng pondo ang naturang drug test upang agad itong maipatupad.
“We have to implement the necessary interventions to spare the youth from the serious negative effects of using illegal drugs at the early stages of their life so that they will be accorded the appropriate guidance for them to shy away from their involvement to the illegal vices. We have to come in this early through the implementation of the random drug test to our high school students so that we will be able to pinpoint those that need government intervention considering that they will be at a loss once they will continue to be involved in illegal drugs,” giit ni Domogan.
Dagdag pa niya ay nakipagkasundo ang lokal na gobyerno sa religious sector sa lungsod na magsagawa ng libreng lecture sa mga pampublikong paaralan tungkol sa masamang epekto ng paggamit ng ipinagbabawal na gamot bilang tulong na rin sa maigting na anti-illegal drugs campaign lalo na sa kabataan na madaling magoyo sa paggamit ng bawal na gamot.
Ani Domogan, maging ang mga pribadong paaralan ay hinihimok na makipag-ugnayan sa religious sector para sa anti-drug lectures sa kanilang mga estudyante.
Samantala, ipinaliwanag ni Domogan na hindi na kailangan ang pangalawang surprise drug test sa mga opisyal at empleyado ng lokal na pamahalaan dahil ang mga nagpositibo sa paggamit ng bawal na gamot ay nagawang baliktarin ang mga naunang resulta ng mandatory drug test.
Hiniling niya sa publiko na ireport sa kanyang tanggapan ang mga opisyal at empleyado na patuloy pa rin ang paggamit ng illegal drugs upang maisailalim ang mga ito sa mandatory drug test para mapatunayan ang ulat at maipatupad ang nauukol na hakbang.
Nauna rito ay apat na empleyado ng gobyerno ang nagpositibo sa paggamit ng bawal na gamot sa isinagawang mandatory drug test sa lahat ng opisyal at empleyado ng lokal na pamahalaan.
Ngunit, isa sa kanila ang namatay dahil sa terminal cancer habang ang tatlo pa ay nagnegatibo ang resulta sa confirmatory drug test matapos na mabigyan ng pagkakataon ang mga ito na baliktarin ang positibong resulta ng drug test. PIO BAGUIO / ABN