Ex-mayor sa Abra, arestado sa maling gamit ng pondo

November 25, 2017 Headlines

LUNGSOD NG BAGUIO – Dinakip ng Criminal Investigation and Detection Group at mga pulis si dating mayor ng Licuan-Baay Christopher Leones Millare Sr., dakong 7am noong Nobyembre 20, mula sa tahanan nito sa barangay Bulbulala, Licuan-Baay, Abra dahil sa diumano ay public fund misuse nang nanilbihan itong pinuno ng bayan noong 2010-2013.
Ang pag-aresto sa dating mayor ay iniutos ni Sarah Jane Fernandez, chairperson ng 6th division ng anti-graft court dahil sa dalawang kaso ng malversation of public funds sa Sandiganbayan sa ilalim ng CC Nos. SB-17-CRM-1722 at 1723.
Noong 2015 ay napatunayan din ng Ombudsman na guilty si Millare Sr. sa kasong simple misconduct sa termino nito noong 2010-2013 at inutusan ito na magbayad ng multa na katumbas ng tatlong buwan na sahod nito.
Ang multa ay ipinataw ni Ombudsman Conchita Carpio-Morales dahil sa maling paggamit ni Millare Sr. ng 20 porsyentong Development Fund ng Licuan-Baay noong 2011 at 2012 para sa rehabilitasyon ng municipal hall.
Sa kanyang termino diumano ay naglaan si Millare ng P3.2 milyon ng public funds sa ibang pakay na iba sa itinakda ng batas na paggamitan nito.
Nakita ng Ombudsman na may sapat na ebidensya kontra kay Millare at pinatawan ito ng multa na katumbas ng tatlong buwan na sahod nito na dapat bayaran sa tanggapan ng Ombudsman.
Si Millare, na natalo sa kanyang pagtatangka sa re-election noong 2013 at maging sa kanyang muling pagtakbo sa halalan noong 2016, ay pinayagan na magbayad ng piyansa para sa pansamantalang kalayaan na P6,000 sa bawat kaso sa naipilang two counts ng fund misuse. ACE ALEGRE / ABN