Gamit pang-saka mula DA, hinarang ng kongresman

July 23, 2017 Provincial

SAN JUAN, ILOCOS SUR – Napurnada ang tatanggapin sanang kagamitan mula sa Department of Agriculture para sa anim na asosasyon ng mga magsasaka sa Cabugao, Ilocos Sur matapos na diumano ay harangin ang pamamahagi ng mga ito bunsod ng away sa pagitan ng lokal na gobyerno at ng pamilya ni second district Rep. Deogracias Savellano.
Ayon sa grupo ng mga magssaka na Solidarity of Peasants Against Exploitation (STOP Exploitation), iniulat ng kanilang mga pinuno at miyembro sa Cabugao municipal chapter na Alyansa Dagiti Kumpang ti Cabugao (ALCUMPAC) na apektado ng naturang away ang paghahatid sa mga gamit na pang-saka mula sa DA.
Ang mga asosasyon ng magsasaka sa mga barangay ng Salapasap, Baclig, Nagsingcaoan, Sabang at Sisim, pawang sa bayan ng Cabugao, ay tatanggap sana ng hand tractors at water pumps at isang 4-wheel tractor ngunit pinigilan umano ni Savellano.
“We are urging all parties concerned to shape up, leave projects and services for farmers out of their differences,” pahayag ni Zaldy Alfiler, secretary general ng Stop Exploitation.
Aniya ay dapat na isantabi ng mga opisyal ng Ilocos Sur ang pamumulitika at sa halip ay tutukan ang paghahatid ng suporta na kailangan ng mga magsasaka upang mapaunlad ang sektor ng agraryo.
“We have received reports from our members that six farmers association were supposed to receive tractors from the DA but according to the department’s personnel in Batac, Ilocos Norte, Cong. Savellano asked to put the release of the equipment on hold,” ani Alfiler.
Si Savellano ay hindi pa makontak para makuhanan ng panig nito.
Ayon kay Alfiler, ang naturang away ay nagsimula sa pagtatalo ng pamahalaan ng Cabugao at pamilya ng Savellano ukol sa pamamahala ng Cabugao Beach Resort. Nauna rito ay inaprubahan ng Cabugao Sangguniang Bayan ang isang resolusyon na pumupuna sa anak ni Savellano na si Nicole ng trespassing dahil sa pagtanggi nitong umalis sa pasilidad para sa bidding ng panibagong lease contact.
Dagdag pa ni Alfiler, sinabi ng ALCUMPAC na hindi ito ang unang pagkakataon na nabinbin ang pagbibigay ng assistance sa mga lokal na magsasaka sa Cabugao bunsod ng pagharang ng mga politiko.
“The last thing we need are politicians getting back at each other at the expense of farmers, it is appalling for public officials to let politics affect the delivery of vital assistance to us,” giit ni Alfiler. ACE ALEGRE / ABN