Ginggined, Apo pakawanenna kami!

February 18, 2017 Opinion Sirmata ken Tagtagainep ni Mang Gusting

Yahooo, yahooo… kumusta kayon kailian mi ida nga awan labasna. Gagayyem ken saanmi a gagayyem, naimbag nga oras yo amin nga awan maidumduma ania man ti ar-aramidenyo ita nga oras kangrunaana kadagiti nakailad dita papag iti siruk ti logo wenno indian manggo nga agbasbasa iti isyu tayo ita iti Amianan Balita Ngayon… sapay la koma ta napia kayo amin ket adayo kayo iti sakit wenno aniaman a sagubanit ti bagi. Ta kuna ngarud tay gayyem tayo a professor… “Mang Gusting,” kunana, “annadam ta bagim ta awan kapatgan a gameng itoy a biag no saan a ti salun-at.” Ta uray no kasanut rigat ti biag no nakaradkad ka, abakem pay tay baknang ken aglaplapusanan ti sanikuana a naidalit met iti sakit.

Daytoy man pay ti tip nga innak ibaga Kayong Angkuan ken dakayo a sukimi ti ABN. Napagsasaritaan tayo met laengen ti salun-at, saanko nga ammo no mamati kayo iti daytoy nangruna ken Editor tayo a ni Thom…adda tay nabasa tayo a daan a magazine nga i Iluko. Maipapan daytoy iti banag a mangpapigsa iti resistensia…katawa, papigsaenna kano ti resistensia. Dayta man ti intay ibinglay kadakayo ta bareng no sumayaat ti rikna tayo. Ti kano panagkatawa iti uneg ti 20 a segundo, itdenna iti bagi ti isu met laeng a kaadu ti oksiheno a pangpaksiat iti stress a kas no koma agehersisioka iti uneg ti tallo minuto. Agasem ngay dayta, Kayong, ala, katawa ngaruden, haahahahhahaha. Kunana pay, no agkatawa ka, mapan iti utekmo dagiti kemikal a maawagan iti endorphins a mangkissay iti ut-ot wenno mangtellay iti marikriknam a nasakit iti bagim malaksid pay a pumigsa ti resistansiam iti sakit.

Agbuyaka ngarud kadagiti cartoons, TV shows a nakakatkatawa wenno agbasaka kadagiti makapakatawa wenno agbasaka kadagiti makapakatawa kenka. Nasayaat met no kainnestoriam dagiti gagayyemmo maipanggep kadagiti nakakatkatawa a banag tapno mayat ti rikna. Padasem ti mapan iti barbershop ni Ama Akong ta makitam, adu ti istorya pugpugot nga inka mangngegan. Ala, dayta pay laeng ti intay mai-share ita.

Iti napalabas, nadayyeg manen ti pampanunot ken rikna tayo nangruna kadagiti kailian ken kakabsat tayo nga adda idiay Surigao gapu ngarud iti napasamak a panagdayyeg wenno ginggined sadiay a no sadino ket nangibati iti tallo a natay no saan tayo a nagbiddut ken saanen a nanayonan. Adu ti nadadael a sanikua ket siempre, nagparikut manen dagiti kailiantayo a nakarikna iti dayta a ginggined. Malagip tayo la ket ngarud ti makuna a killer earthquake idi 1990 a no sadino ket adu ti natay ken nadadael a pasdek ken sansanikua. Ket maysa ti siudad ti Baguio ti nadalapus kasla kanibusananen ti lubong…ket ayna, makapaluksaw a makaparurod idi Kayong ta kasdiay gayam ti tao ania, no addan umay a didigra, uray dagiti annak ti hudas este dagiti makuna a rinuker ti utekna ket ammona met gayam ti umawagen iti Dios. Ngem, ala, no adda pannakabalinna saanko a kayat a lagipen dayta a pasamak. Ket daytoy ti makadakes ita, Kayong Angkuan, adda met dagiti sabali a mapaspasamak a nakarkaro pay ngem ginggined a makadadael iti pampanunot ken ganas a kunada. Ania dayta kunam kadi, Kayong Angkuan? Sus, Kayong manmanoak nga agbiya iti damag ta kasla yegyeg wenno ginggigined manen dagiti saan a malmalpas nga isyu. Kayatdan sa a kaluban manen ti isyu maipapan iti drug trade idiay Muntinlupa ket dayta, riniingda manen ti nakaturog nga isyu maipapan iti Napoles.

Apowww, sus maria kusina, overtime tayo manen kailian. Despensa, Amigo Editor, ninto met ngamin Kayong Angkuan ta di maum-uma a dumngeg kadatayo. Bueno, Kakailian, agingga manen ditoy ti intay panagiinnistorya ta inkam man pay kumape ken Pare Jun dita nay pagkapkapian dagiti pada a dual citizen, nagmayat ngamin ti agigup iti kape barako, sus, ina aya…anian a banglona, Kayong mapantayon, agpaypayapayen ni Apo Editor. Babayooo, tsuptsup muahmuah. Adios mi Amor!