Gun-for-hire nasakote sa Ilocos Sur

January 28, 2019 Provincial

CAMP BGEN OSCAR M FLORENDO – Isang tinaguriang high value target (HVT) ng pulisya na miyembro ng gun for hire, ang nadakip sa drug-buy bust operation sa Barangay Guimod, Bantay, Ilocos Sur, noong Enero 23.
Kinilala ni Chief Superintendent Romulo Sapitula, regional director ng Police Regional Office-1, ang nadakip na si Marvin Y. Macugay, 30, ng Sta. Cruz, Sinait, Ilocos Sur.
Nakatala sa pulisya bilang Level 2 High Value Target at kilala bilang miyembro ng Igne-Rosete Gun-for-hire Group na may operasyon sa Region 1, hanggang National Capital Region (NCR).
Ayon kay Sapitula, magkasanib na puwersa ng CIDG Ilocos Sur, Regional Intelligence Division of PRO1 (RID-PRO1), Ilocos Sur Hi-way Patrol Group (HPG), Provincial Intelligence Board (PIB) at Bantay MPS ang nagsagawa ng operasyon at nakuha sa suspek ang isang .38 caliber homemade revolver at walong bala nito; isang hand grenade at dalawang piraso ng P500-peso bills na ginamit bilang buy-bust money.
Sa imbestigasyon, napag-alaman na si Macugay ay nadakip noong Nobyembre 24, 2016 sa kasong paglabag sa R.A. 10591, pero nadismis ang kaso nito at noong Disyembre 27, 2016 ay kusang-loob na sumuko ito, matapos malamang ibinilang siya sa pagiging drug personality.
Sa Pangasinan, nagsagawa ng search warrant operation ang mga tauhan ng RID-PRO1 at Calasiao MPS laban kay Ringor Osian Zulueta, 34, laborer,ng Barangay Nagsaing, Calasiao, Pangasinan sa kasong paglabag sa RA 10591.
Ang operation ay nagresulta sa pagkakakumpiska ng isang caliber 38 revolver; isang COMO holster at bala ng cal. 7.62. Bagamat wala ang suspek nang isagawa ang operasyon ay sinampahan na ito ng kaso.
Samantala, sa kabuuang 1,254 checkpoints ng pulisya sa rehiyon simula nang implementasyon ng gun ban noong Enero 13 ay nakakumpiska ang pulisya ng 32 assorted firearms at pagdakip sa 42 persons, na sinampahan ng kasong paglabag sa Omnibus Election Code.
Zaldy Comanda/ABN