Hay naku!

September 25, 2017 Opinion Sirmata ken Tagtagainep ni Mang Gusting

Hellooo, hellooo…naimbag nga oras kadatayo amin kakailian. Addakam manen nga umay maki-abrasa ken makinnistoria kadakayo babaen iti ABN. Naimbag nga oras kadakayo amin nga awan malabusan este malabsan kunami koma. No dakami met ditoy batugmi a langit, sus maria kusina, saan a maawatan ti paniempo na. Dandanin aggibus ti bulan ti September kakayong ngem anian, matotodo pay laeng, kasanu man ngatan dagitay nasapa a naggapasaen? Pagimbaganna laeng ta saan unay a napigsa dagiti naglabas a bagyo a nangdalapus kadatayo ta no saan, sus, diak la ammon no ania man napasamaken kadagiti raep ken mulatayo a mais kas kada natnateng. Isu a makuna a nagasat tayo pay laeng ket rebbengna laeng nga agyaman tayo iti Namarsua.

Ania, Kayong Angkuan, kumusta metten ti biag? Bayat a masursurat daytoy kolum tayo madama pay laeng ti rally iti nagduduma a paset ti pagilian nangruna kadagiti makuna a key cities. Nagduduma ti lablabidenda nga uray dagiti awan pay laeng nanangda idi ket ngawngawda a ngawngaw maipapan iti Martial Law nga impaulog daydi nag-Presidente Ferdinand E. Marcos wenno nalatak iti awag nga Apo Lakay. Karbenganda met ketdi ti mangipeksa it an-anek-ekenda, kasta met ti nagduduma a komento maipapan iti ibagbagada nga EJK wenno extra judicial killing kanu.

Ammom, Kayong Angkuan ken kakayong ania, no dakami nga agtutubo idi a panawen no siak ti pagdamaganyo, kayatko ti martial law ta nadisiplinaan dagiti tao. Ta no saan nga inaramid daydi Apo Lakay ti kasdiay, ania ngatan ti nagbanagan tayo? Sabali ngatan a taray ti biag wenno gobierno tayo ita. Amangan no under tayon iti Tsina. Koma, sakbay nga agngakngakda dita kalkalsada, sukisokenda koma a nasayaat no ania ti husto a pakasaritaan. Wen, adda panaglabsing idi ngem, saan met a kasta ti ammomi a bilin ngem ketdi dagiti abusado idi ti naglablabes.

Adu ti nagbaliwan ti taray ti biag idi Kayong Angkuan. Awan pay dagita marmarijuana wenno ania pay dita. Ti ketdi ammok, basta nagalas-saisen masapul nga addakan iti balayyo ta no saan, tukmaandaka dagiti maseknan. Nupay kasta, uray idi awan pay martial law, kasta ti panangdisiplina kadakami dagiti nagannak kadakami, nangruna no awan ammoda a napanam namnamaem a no saanka a sumangpet iti sumipnget makaipas a kusilap ti maipasabat kenka. Isu nga uray idi panawen ti martial ammomi daytan a paglintegan iti mismo a pagtaenganmi ket nanayonan manen ti disiplina kadakami nga agtutubo idi mayitnag ti curfew kadagiti minors. Di kad awan makapag-bisio idi kayong?

Koma, kadagiti ngakngak a ngakngak, agamirisda. Agtimbangda no ania ti ad-adu ti naipaayna ti pannakayitnag idi ti martial law wenno nagdaksanna. Ta no bilang dagiti ibagbagada a biktima ti martial law ket makuna a minimal laeng ta uray awan martial, kitaem no ania ti crime rate. Ita konkondinarenda ti kampania ti gobierno kontra droga. Tay kunami ngarud, ania ngata no anakda wenno kabagyanda ti na-rape ket maysa a drug addict ti nang-rape? Diak la ammo no dida wayasen ti suspect. Hay naku! Hay naku manen ken hay naku latta!

Ala, kayong, nalpas manen ti puli…naimasak metten ti naki-innistorya kadakayo ti sango ti tiangge ni ikit Kuanang. Baliwan tayo to manen ta ne, dakesen, amangan isurotda manen ti binalsig, nalipatak tay pagatgatang ni Sofing. Babayooo, tsuptsup muah muah.