Higit 60,000 aso sa Benguet, mababakunahan ng anti-rabies sa taong ito

March 10, 2018 Provincial

LA TRINIDAD, BENGUET – Target ng Provincial Veterinary Office (PVO) na bigyan ng anti-rabies vaccine ang 63,388 aso sa taong ito.
Sinabi ni PVO head Mirian Tiongan noong Martes na ang libreng anti-rabies vaccination ay isinasagawa na sa 13 munisipalidad ng Benguet mula pa noong Pebrero sa pakikipag-koordinasyon sa municipal agriculturists, barangay officials, Department of Health (DOH) at ang Philippine National Police (PNP).
Ayon pa kay Tiongan ay apat na karagdagang personnel ang kinuha upang tumulong sa vaccination program upang makamit ng PVO ang target nito.
Sinabi pa niya na ang mga bakuna ay galing sa Bureau of Animal Industry ng Department of Agriculture (DA-BAI).
Ang nasabing libreng dog vaccination drive ay tatagal hanggang Mayo ng taong ito para maitampok sa Rabies Awareness Month na may temang “Barangay Kaagapay sa Rabies Tagumpay.”
Hinikayat ni Tiongan ang publiko na maging responsableng pet owners sa pagkukusang pabakunahan ang kanilang mga alaga.
Noong 2017 ay namonitor ng Benguet PVO ang tatlong kaso ng rabies-infected dogs – tig-isang kaso sa Camp 1, Tuba; Ucab, Itogon; at Beckel, La Trinidad. ABN