Higit kailanman, Coolest Palaro ngayon na

Taong 1996 ay sinubukan ng lungsod ng Baguio na lumahok sa bidding upang maging punong-abala sa prestisyosong taunang Palarong Pambansa subalit naging matamlay ito at hindi na muling naulit pa. Ang Palarong Pambansa ay isang taunang multi-sport event na nagsimula pa noong 1948 na nilalahukan ng mga atletang-estudyante mula sa 18 rehiyon ng bansa na inorganisa at pinamamahalaan ng Department of Education.
Ang mga atletang-estudyante mula sa mga pribado at pampublikong paaralan sa elementarya at sekondaryang lebelo ay maaaring makipagpaligsahan basta kuwalipikado at nananalo sa kani-kanilang pang-rehiyon na paligsahan. Para sa mga batang manlalaro, ang Palarong Pambansa ay ang kulminasyon ng kompetisyon sa palakasan ng mga paaralan na nagsisimula sa mga lokal na intramurals, na susundan ng congressional district, provincial at regional athletic meets. Karamay ang mga lokal na pamahalaan sa bawat tagumpay ng mga atletang-mag-aaral, kaya lubos ang suporta ng mga opisyal sa bawat pakikilahok nila.
Nag-umpisa noong taong 2015 ay nilikha ang Palarong Pambansa Board sa bisa ng Palarong Pambansa Law ng 2014 ang siyang pangunahing responsable sa preparasyon at pagpapatupad ng palaro. Ang board din ang nagsisilbing policy-making at coordinating body ng taunang torneo. Noong una, ang pagiging host ng pambansang palaro ay itinatakda ng lahat ng regional directors ng DepEd habang ang kasalukuyang gawi ay nagpapalit-palit ang mga Undersecretaries ng DepEd sa pamumuno ng komite na siyang namamahala sa palaro.
May mga lungsod at probinsiya na ang ilang beses nang naging host ng Palarong Pambansa subalit ni minsan ay hindi pa natikman ng lungsod ng Baguio ang karangalang maging punong-abala kahit pa malaki naman ang kuwalipikasyon maliban sa taguring Summer Capital ng Pilipinas nito.  Minsan sa nakaraan ay naging dako ito ng mga pagsasanay ng mga pambansang atleta sa ilalim ng Gintong Alay program na nagbigay karangalan sa bansa at humubog sa magigiting at mahuhusay na manlalaro at atleta.
Ngayon na at hindi kailanman dapat maging punong-abala ang lungsod ng Baguio para sa Palarong Pambansa 2018 dahil dito lamang sa lungsod akma ang taguring “Coolest Palaro”. Subalit upang maging lubos na maging malakas ang tiyansa ay tama lamang na ipakita ng mga opisyal at iba’t ibang sektor ng Baguio, La Trinidad at buong probinsiya ng Benguet ang pagkakaisa upang maipakita sa  Palarong Pambansa Board na karapat-dapat at handa na ang lungsod ng Baguio na maging host  at ito ay pinanindiganan nila sa paglunsad ng pagpirma ng lahat ng sektor sa isang Pledge of Commitment.
Palarong Pambansa 2018 sa Baguio, ngayon na!                                        PMCJr.

Amianan Balita Ngayon