Hiwaga at alindog ng Yamashita Treasure, patuloy pa rin?

March 25, 2017 Editorial

Ilang dekada na ba ang nakakaraan nang sumiklab ang ikalawang digmaang pandaigdig at sinakop ng bansang Hapon sa pamamagitan ng Imperial Army nito sa pangunguna ni General Tomoyuki Yamashita, isang apelyidong hanggang ngayon ay hindi pa rin nakakalimutan at tila naging mahalagang bahagi ng kasaysayan ng Pilipinas.
Naging matunog at nag-iwan ng pinag-usapang alamat si Yamashita nang diumao’y sa panahong bago at malapit na silang masukol at mapasuko ng Allied Forces sa pangunguna ng Estados Unidos ay nagbaon daw ang mga sundalong hapon ng mga kayamanang nakamal nila mula sa mga bansa sa Asya sa iba’t ibang lugar sa Pilipinas. Dahil dito ay maraming istorya ang sumibol at maraming tao ang pumatol sa istoryang ito at naging mga “treasure hunters”.
Lalong uminit at umugong ang alamat ng Yamashita Treasures nang lumutang ang istorya noong dekada ’70 na diumano’y pinahirapan si Gerry Roxas na siya raw nakahukay sa Golden Buddha ng noo’y Presidente Ferdinand Marcos upang mabawi lamang ang kayamanan.
Ang alindog ng Yamashita Treasures ay nagpatuloy na marami na ring napaulat na naaresto, nadisgrasya at namatay dahil na rin sa paghahanap at paghukay sa mga kayamanang ito gaano man ito kalalim at mapanganib. Marami silang treasure hunters, ang ilan ay lisensiyado pa at ang ilan ay hindi, subalit wala pang nagsasabi at umaaming nakahukay na nga sila sa kabila ng maraming istorya ng biglang yaman.
Ilang buwan na rin ang nakalipas mula pa noong nakaraang taon nang may isang grupo ng mga treasure hunters na ikinakatawan ni Eliseo Cabusao ang humingi ng exemption mula sa konseho ng Baguio para makapaghukay sa may bahagi ng Baguio Convention Center gamit ang makabagong instrumento na ayon sa kanila ay pinatibay pa ito ng tinatawag na “live pointer” na isang 90 anyos na hapon na itinuro sa kanila ang mismong lugar ng kayamanan. May ordinansa (city environmental code) ang lungsod na ipinagbabawal ang paghuhukay (treasure hunting) saan mang lugar sa lungsod. Subalit nakakuha ang grupo ni Cabusao ng treasure hunting permit mula sa National Museum of the Philippines at ito ang ginamit nilang dokumento upang makakuha ng exemption sa ordinansa. Kamakailan ay pinayagan ng konseho ang grupo ni Cabusao upang i-explore ang nasabing lugar at kung totoong mayroon nga itong laman ay kailangang i-rehabilitate ang lugar at kukunin ng national government ang 35 porsiyento, 35 porsiyento sa pamahalaang lungsod at maiiwan ang 30 porsiyento sa humukay.
Nananatiling palaisipan pa rin at kailangan mapatunayan ang pagkakaroon ng ibinaong kayamanan, at kung ang pangingibabaw ng permiso ng NMP laban sa ordinansa o kodiko ng lungsod ang makapagpatunay ay maaari tayong magpasalamat sa grupo ni Eliseo Cabusao dahil malaking pakinabang ito sa lungsod. Subalit maging pahiwatig sana ito sa anumang kahihinatnan mabuti man o hindi sa ibang panig ng bansa na nagnanais sumubok din sa naging hakbang ng grupo ni Cabusao. Pmcjr.