Honorable!

March 4, 2017 Opinion Sirmata ken Tagtagainep ni Mang Gusting

Naimbag nga oras yo amin kailian nga awan labusna este labasna, sadino man a batug ti langit ti ayanyo wenno suli ti lubong, opssss, suli ti lubong, saan aya a nagtimbukel ti lubong? Ania ngay ti madamag, kakailian. Okey kadi met laeng ti kasasaad yo dita… no dakami ti kas yo kayat nga ammuen kailian, kasla saan….ania ti gapuna a saan? Dikay makadlaw aya. Di, mano a senador ti naikarsel gapu iti maatap a pannakainaigda iti kunniber wenno panagawat iti pasuksok ngem ita, maysa met a senadora ti inarestarda gapu iti maatap a koneksyonna iti maiparit nga agas. Sus santisema a babassit a kunada. Ania ngay itan dagitoy a mapaspasamak, “honorable” kunadansa kadagitoy a madaydayaw ngem apay ngay. Ania itan Kailian, kayong Angkuan, makuna pay ngarud nga honorable ket maarestar payen gapu iti maatap a pannakainaigna iti shabu trade nga iti pay met mismo nga uneg ti kadakkelan a pagbaludan, sus santisema manen!

Ala, panawan tay man pay apagbiit dayta a pagsasaritaan, Kailian ta makadadael iti mood a kunada. Ngem joking aside, kasano pay a makunam nga honorable dagitoy ita ket -kasanun no mapaneknekan a pudno gayam dagitoy a maipabpabasol kenkuana? Ken, adda man gayam malagip tayo Kayong, kumusta met ngatan dagitay nadetinee a senador iti maysa a kampo gapu iti maatap a panagkunniber da..alagipmo dagitay sikat wenno nalatak nga artista a senador nga agingga ita ket nakapupokda pay laeng, Kayong? Ania kadin nga agpasyo ti resulta daydiay? Sus kaasida met. Gapu iti kinaginad ti sestima agingga ita, saan pay laeng a napaneknekan no pudno wenno saan dagiti naipabasol kadakuada. Opssss, anian, kunak a panawan tayo pay laeng dayta a topiko ngem mapan latta met.

Daytoy man ketdi flower festival ti intay pagsasaritaan, Kayong Angkuan. Sus, no nakaumayka koma a nagbuya iti parada dagiti nagsala-sala iti Session Road a nagpababa ken ti float parade a no sadino ket naarkusan iti nagdududma ken nagpipintas a sabong nga adda pay dagiti sikat nga artista a naglugan. Apowww, unayen, Kayong segurado koma a napresko-an met ta utek ken matam a nagbuya ta nabsogda iti agkakapintas a buya. Hahaha, nagpinpintas a buya kunami a ta adda ngarud dagitay artista iti pelikula nga isu met ti maysa nga inarak dagiti nagbuya a dimmayo pay manipud kadagiti nagduduma a lugar, lokal ken ganggannaet a turista dagiti immay ditoy siudad dagiti saleng, Kayong Angkuan. Ket swak na swak ti income a napastrek ti gobierno ti siudad. Dakkel ti napastrek dagiti hotels, inn, transient house ken dadduma a mabalin a pagdagusan. Malaksid pay kadagiti naturog kadagiti luganda ken nagaramid iti tent dagitoy.

Ngem, sus Kayong Angkuan, no ammom la koma ti napasamak kalpasan ti parada, Kayong. Sus, santambak na basura a kunada hahahaha. Agasem ngay ket inton rumuar daytoy a kolum tayo ammok a nalpas to metten ti closing ceremony ti Flower festival. Malaksid kadagiti hotel ken dadduma a pagdadagusan a kimmita, uray iti benneg ti transportasyon ngem sus mariosep met a traffic, adda ngata met laeng nabirukanda? Wenno kimmita da ngata met?

Dagiti gardinero wenno nagmulmula iti sabong ti segurado a kimmita iti dakkel, Kayong Angkuan. Dayta ti ammok ta nangina ti pinaglakoda. Agasem ngay a sabong a nausar kadagiti float, isu nga ay sus, nagasat la dagiti nagasat ngem siak sa met ti agmamalas ngamin, umayen ta pang-or ni Sofing, isu a babayooo!