ILOCOS REGION NAGREKORD TI PANANGPANGATO TI INFLATION RATE ITI OKTUBRE ITI 1.9%

November 16, 2024 Headlines

MALASIQUI, Pangasinan

Nairekord ti panagngato ti inflation rate iti Ilocos Region iti 1.9 a porsiento idi Oktubre ita a tawen manipud iti 0.6 a porsiento idi Setiembre, gapu iti panagparpartak ti food and non-alcoholic beverages index, impadamag ti Philippine
Statistics Authority (PSA). Iti virtual forum idi napalabas a Mierkoles, kinuna ni PSA Ilocos Supervising Statitstical Specialist Teresa Olarte a ngimmato iti 2.4 a porsiento ti inflation iti food index idi Oktubre manipud -0.7 porsiento idi Setiembre.

Ti implasion ti bagas ket adda iti 8.4 a porsiento manipud iti 3.1 a porsiento; mais iti 18.2 porsiento manipud 16.7 porsiento; karne ken dadduma pay a naparti nga animal iti daga iti 4.3 porsiento manipud 3.1 porsiento; ikan ken
dadduma pay a seafoods iti 1.6 a porsiento manipud 0.2 a porsiento; ken nateng, isu, cooking banana ken pulses iti –
16.3 porsiento manipud -28.8 porsiento. Kasta met, implasion ti gatas, dadduma pay a produkto ti gatas ken itlog iti 3.4 porsiento manipud 2.7 porsiento, asukar, kendi ken dessert iti -2.6 porsiento manipud -3.9 porsiento, ready-made food ken dadduma pay a produkto a taraon iti 9.5 porsiento manipud 8.6 porsiento, ken lana ken taba iti 0.3 a porsiento manipud 0.1 a porsiento.

Iti sabali a bangir, bimmaba ti rate ti panagngato ti presio dagiti prutas ken bukbukel iti 5.3 a porsiento idi Oktubre manipud iti 7.5 a porsiento ti napalabas a bulan. Ti promedio nga implasion iti Ilocos Region agingga ita ket 2.1 porsiento, nababbaba nga amang ngem iti 5.7 porsiento iti isu met laeng a panawen idi napan a tawen. Kadagiti probinsia, nairekord ti Ilocos Sur iti kangatuan nga inflation rate idi napan nga Oktubre a 3.8 porsiento, sinaruno ti La Union, 2.2 porsiento; Pangasinan, 1.6 porsiento; ken Ilocos Norte, 0.6 porsiento.

Imbaga ni Department of Agriculture (DA) project evaluation officer Jinnefer Pulamo, kabayatan ti nasao met laeng a briefing, a naapektaran ti presio dagiti produkto ti agrikultura gapu kadagiti napalabas a pannakariribuk ti paniempo a nangapektar iti rehion. Nupay nasurok a 100 a porsiento nga umdas ti rehion iti kaaduan a produktona iti agrikultura, dagiti presio ket ikeddeng latta ti merkado, kinunana. “Adda buffer stocks tayo nga maited kadagiti mannalon para iti rehabilitasion ti taltalonda tapno masigurado ti umdas a suplay ti agri-products iti sumaruno a bulan,” kinuna ni Pulamo iti pagsasao a Tagalog.

Imbaga ni National Economic and Development Authority (NEDA) Ilocos chief economic development specialist
Ednore Freynon Perez iti nasao met laeng a pasamak, a nupay naparpartak ti implasion ti food index idi Oktubre a nangiposte iti 2.4 a porsiento, manipud iti – 0.7 a porsiento idi bulan ti napalabas, agtalinaed a nabannayat daytoy ngem iti 9.3 a porsiento iti tawen ti napalabas. Kinunana a ti nangatngato a presio ti gasolina, gapu iti geopolitical tensions iti ballasiwtaaw, ket nakanayon met iti naparpartak nga inflation rate idi napan nga Oktubre. Gapu ta manamnama nga ad-adda a ngumato ti panagkasapulan bayat ti kalam-ekna iti kaaduan a pagilian iti ballasiw-taaw, ken kasta met dagiti presio, mangnamnama a dagiti polisia maipapan iti lana ti sumsumrek a Presidente ti Estados Unidos a ni Donald Trump ket addaan iti positibo nga epekto iti implasion.

(HA-PNA Ilocos/PMCJr.-ABN)