Iringan ng Pangasinan-Benguet dahil sa isang sitio, lumala

October 29, 2017 Provincial

LINGAYEN, PANGASINAN – Ibinigay ng Sangguniang Panlalawigan (SP) ang buo nitong suporta sa munisipalidad ng Sison sa paggiit nito na kabilang sa nasasakupan ang Sitio Saguitlang sa Barangay Labayug, Sison na diumano ay inaangkin ng munisipalidad ng Tuba, Benguet.
Sa isang resolusyon sa regular nitong sesyon noong Lunes (Oktubre 23), inendorso at sinuportahan ng SP ang lokal na pamahalaan ng Sison.
Inamin ni Fifth District Board Member Rosary Gracia Perez-Tababa, sponsor ng resolusyon, na ang matagal at hindi pa nasolusyunan na hidwaan sa boundary sa pagitan ng Sison at Tuba ay muling naungkat nang ipinasa ng Sangguniang Bayan (SB) ng Tuba ang isang resolusyon na humihiling sa kinauukulang ahensya ng gobyerno na ibigay ang bahagi nito sa paggamit ng Northern Cement Corporation (NCC) sa likas na yaman ng lugar.
Bilang tugon sa resolusyon ng Tuba ay ipinasa rin ng SB ng Sison ang sarili nitong Resolution No. 17-066 na maigting na iginigiit na ang Sitio Saguitlang ay nasa teritoryo ng Barangay Labayug, isang distrito at legal na barangay ng Sison.
Nauna rito ay umapela ng suporta mula sa SP si Sison Mayor Danilo Uy, habang inihahayag na ang Sitio Saguitlang ay bahagi ng kanyang bayan.
Ani Tababa, ang Sitio Saguitlang, kung saan isinasagawa ng NCC ang extraction activity, ay may 1,560 ektarya. Mula nang sinimulan ng NCC ang operasyon dito 50 taon na ang nakalipas ay nagbabayad na ang kompanya ng extraction fees, real property taxes at mining taxes kada taon sa bayan ng Sison.
Sa naturang resolusyon ng SP, sinabi ni Tababa na mula noon ay kinikilala na ng NCC ang Sitio Saguitlang na nasa ilalim ng nasasakupan ng Sison. LEONARDO MICUA, PNA / ABN