Kabataan, nakilahok sa unang Cordillera youth assembly

March 17, 2017 Latest News

LA TRINIDAD, Benguet – Isinagawa ang kauna-unahang Regional Youth Assembly sa Cordillera na ginanap sa Capitol, La Trinidad, Benguet bilang bahagi sa pagdiriwang ng Strawberry Festival.
Ang pagtitipon na may temang “Peace-loving global youth: lead, act and multiply” ay nilahukan ng mahigit 300 na kabataan.
Ayon kay Ronie Sodusta, isang speaker sa programa, ang ibig sabihin ng kanilang tema ay para turuan at impluwensyahan ang bawat kabataan. “Isang ina-address namin ay ang stand for purity,” aniya.
Anim na speaker o lecturer ang nagbigay ng kanilang mensahe.
Si Ama John Mangiwet Gawee Jr., regional lecturer ng Universal Peace Federation ng Cordillera, ang tumalakay sa The Need for Leadership Revolution habang si Ronie Sodusta ng special youth envoy naman sa Principles of Peace. Si Municipal Councilor Roderick Awingan ng La Trinidad ang nagtalakay sa Leadership, Politics and Social Change.
Nagkaroon din ng pagkakataon si Vladimir Cayabas, school administrator ng NIIT, na ituro sa kabataan ang Role of Academe in Promoting Youth Leadership and Social Change.
Panglimang tagapagsalita si Jim G. Botiwey, provincial board member, sa kanyang pangaral sa kabataan tungkol sa Purpose and Transforming the World.
Si Richell Jalipa, director for education ng FFWPU ng Asia, ang tumalakay tungkol sa core values ng isang leader gaya ng pure love, filial piety at patriotism.
Ang layunin ng Regional Youth Assembly ay para pahalagahan ang kadalisayan ng bawat kabataan  lalo na para maturuan at impluwensyahan nang tama ang kabataan.
Ang Universal Peace Federation o UPF at ang World Collegiate Association for the Research of Principles o WCARP ang nag-oorganisa sa ganitong programa at umiikot sa iba’t ibang lugar para ibahagi ang kanilang layunin sa bawat kabataan.
Samantala, nagkaroon din ng Regional Youth Assembly sa Benguet State University noong March 11. Jessalyn M. Soreno, UB Intern