Kaboommm… finishh!

October 29, 2017 Opinion Sirmata ken Tagtagainep ni Mang Gusting

Hellooo, hellooo, naimbag nga oras kadatayo amin kakailian. Addakam manen nga umay maki-abrasa ken makinnistoria ken makinnisem kadakayo babaen iti ABN. Naimbag nga oras kadakayo amin nga awan malabusan este malabsan kunami koma. No dakami met ditoy batugmi a langit ti kayatyo a maamuan, sus maria kusina, saan a maawatan ti paniempo na. Agtapus ton ti bulan ti Oktobre ngem ania ngay daytoy a tiempona, di maawatan. Napudot iti aldaw, ngem sabali ti salemsemna iti rabii nangruna no parbangon kayong Angkuan, sa pay la awan kakepkepmo. Sa uray kunam nga adda no agbinnukot kayo met laeng a nag-question mark dagiti saka yo. Nalpas, sumabengkan iti lammin, hahahaha.

Sakbay man nga inta makitot-tot Kayong, adtoy man ti maysa nga ababa a pakatawa tayo. Iti naminsan, inistorya ni Pare Ikko ti padasna a napan idiay Baguio City. Kunana, idi kanu adda iti bus, dina kayat ti makakitkita iti babai a nakatakder, ket…

Ikko: Ammom, Chairman Gusting, kagurak ti makakitkita iti babai a nakatakder iti bus no nakatugawak.

Gusting: Kasta kadi Pare Ikko, ket nia ngay ti aramidem no kua?

Ikko: Ay, sus…nalaka laeng, chairman Pare.

Gusting: Ania ngarud kunak?

Ikko: {giggles} Agkidemak laeng, Chairman Gusting, pare

Wahaaaaaa, kasta kadi met ti aramid yo?

Kabommm…nalpas kamaudiananna, Kayong Angkuan. Kalpasan ti 153 aldaw a gubat idiay Marawi City, Mindanao, iti nagbaetan dagiti rebelde kontra iti armada ti pagilian, nalpas met laengen. Ngem nangibati met daytoy iti 360 a natay manipud kadagiti soldado, rebelde ken dagiti inosente a sibilian a naipit iti nasao a ranget. No intay malagip, nangrugi daytoy a riri idi Mayo 23, 2017 no saantayo a nagbiddut. Daytoy ti inawaganda iti The Battle of Marawi wenno tay kunada a Marawi Siege ket dimmanun daytoy iti lima bulan Kayong a ranget. Adu ti nadadael a sanikua wenno pasdek iti nasao a siudad, nagparukpok ti dara ti agkadaraan. Ania ngamin ti talaga a rason no apay nga adda dagitoy a conflict a makuna wenno saan a panagkikinnaawatan? Ania ti gapuna nga adda dagitoy a grupo a mangkontra iti gobierno? Ania ti kalkalikaguman da. Koma, ti agdama nga administrasyon ket kitaenna dagitoy a parikut, sukiso-ken wenno lukaisanda ti talaga a puon ken ramut daytoy wenno kakastoy a pasamak. Daytoy koma ti ikkan “pansin” a kunada dagiti agkakadayaw a nabotosan nga opisyal tayo, saan ket nga—-ay Ina aya, agburek manen ti royal blood ta no kastoy Kayong. Makasao ta manen a kunak.

Ngem ti maysa a padaanan tayo, Kayong Angkuan, Kakayong mi ida, ti dakkel a donasyon para iti makuna a rehabilitation ti Marawi. Amangan no kas manen iti napasamak idiay Tacloban idi sinapli-saplitan ti bagyo Yolanda daytoy a no sadino ket makuna a kadakkelan a didigra… nagdakkel idi ti naipadamag a donasyon para iti rehabilitation daytoy ngem nagbalin manen nga isyu ti saan a pannakaaramat ti nasao a  donasyon. Sus ina aya, ania la ketdin nga agpayso ti aramid dagiti agtatakaw aya, puweee. Dakayo koma ti naibala iti kanyon idiay Marawi tapno saanen nga umadu ti puliyo. Koma, saan metten a kastoy ti mapasamak  idiay Marawi.

Ne, ne, ne, Kakayong naimasantayo manen a kunak isu a baliwantayto manen, a. Opsss, aglisika man met iti pagnaak sika Atong. Addaka manen a kunak, pasalsali ka a kanayon. Ania manen ti masapulmo aya? Makalag a numero? Sal-ot ka met, kubrador ka idi kubrador ka pay laeng agingga ita. Ala mapanka laengen agkubra idiay Marawi. Ala man laengen, sige, kalagem man tay opisyal nga agtatakaw ta  balatuannakto no mangabakka. Babayooo, tsuptsup muahmuahhh.