Kabrannnggg, sus apo, anian ti dalagudog!

Hellooo, hellooo, naimbag nga oras kadatayo amin kakailian. Addakam manen nga umay maki-abrasa ken makinnistoria kadakayo babaen iti ABN nupay nagkas-ang ti nagbanagan dagiti kailian tayo iti umabagatan a paset ti pagilian particular iti Marawi City, Kayong. Awan sabali nga intay aramiden no saan a mangikarkararag kadagiti nagbalin a biktima daytoy a riribuk idiay particular kadagiti pimmusay saan laeng nga idi benneg dagiti rebelde ngem ketdi iti benneg ti militar wenno armada ti pagilian.

Nagkas-ang a panunoten no apay nga agingga ita ket saanda a makontrol daytoy a riribuk idinto ta nagbassit a grupo kumpara iti maysa a nasion a mangraut wenno agpanggepp a mangsakup kadatayo. Asino kadi nga agpayso dagitoy a grupo ken ania ti panggepda? Ania ti gapuna a kalkalabanenda ti gobierno? Ania ti kayatda a mapasamak? Ti dakesna ket uray dagiti inosente nga umili ket mairamramanda, hay naku aya ti biag a talaga.

Ti kangrunaan a pakadanagan mi Kayong ket isu ti pannakanayon ti bilang dagiti agbalin a biktima nangruna dagiti matay. Ania ngamin a talaga ti ramut amin dagitoy, ti pannakabukel dagiti nagduduma a grupo a bumusor iti turay? Ania ti makagapu? Koma, daytoy ti solbaren ti gobierno. No dakami ti makunami, umuna ti kinarigat ti biag dagiti pada a marigrigat ket ti met ibabaknang a lalu dagiti babaknang. Naimbag koma laeng no agpapada koma a nadalus a wagas ti ibabaknangda. Ti dakesna ket maipadpadamag met ngarud nga adu ti bumakbaknang gapu iti kunniber.

Mangrugi manen Kayong ti panagtotodo, nagduduma manen a kalamidad ti agpangpangta kadatayo. Nangruna kadagiti adda iti bakbakras ti bantay kas ditoy siudad ti saleng. Tunggal dumteng ti kastoy a tiempo, idandanagan ti posible a reggaay ket adda mairaman a balay ken maipatli a biag. Damage to property and lives kunadansa itay, hehehe, carabao English ken good for seconds only hahaha.

Kabayatanna, maysa pay a pagam-amkan tayo no kastoy a tiempo ket adda dagiti maipadpadamag a matamaan ti kimat. Kabrommm…sus ina, naimbag no puon ti niog wenno kayo laeng ti mapuntaan ngem adda met dagiti maipadpadamag a tao nangruna kadagiti adda iti tay-ak no kasta nga aggurruod ken agkanabsiit a kimat. Isu a saan laeng a dagiti kanyon wenno mortar a maipabanto kadagiti rebelde ti nakabutbuteng ngem ketdi isu ti gurruod ken kimat ta pulos a dimo mailemmengan. Wen, Kayong, annad ti amin nga annad no kastoy a tiempon nga uray addaka iti uneg ti balay di pay makuna a safe ka, ta adda dagiti naidamag a nakimat bayat ti panagig-iggemna wenno panagtitextna bayat ti gurruod ken kimat. Wenno saan, nakaukod da iti nuang ket saan laeng a tay nuang ngem ketdi agraman diay tao ket nakimat.

Iti sabali met a banda, sabali met ti gurruod ni bumaket no naladaw a sumangpet ni lakayna ken nabartek pay. Wenno saan, sabali ti nagturoganna ta ti met ridaw ti balay ni kumarena ti nastrekna gapu’t bartekna, hahaha, no nabartek laeng ti gapuna…sus maria kusina, dagita met ti gurruod a parnuayen ti kasla armalite a ngiwat ni baket nangruna no naladaw a sumangpet no aldaw ti sueldo ket ti la maipampambarna ta gayam naisongsong a napan iti videoke bar a no sadino ket adda idiay ti kabarbaro a nakaisulekan dagiti matana. Hay Apo aya, dakayo a talaga umdas la koman a naginum kayo iti balay yo ta no nabartek kayon ket segurado nga iti kama yo nga agassawa ti ayanmo wenno pagturogam, hahaa.

Alan Kayong Angkuan, kasta pay ta ne narigaten no data met ti magurruodan no di maurayen ni Sofing ti pinagatangna a manteka. Babayooo, tsuptsup muahmuah.

Sirmata ken Tagtagainep ni Mang Gusting

Amianan Balita Ngayon