La Union at Pangasinan, kinilalang top rice producers

LUNGSOD NG SAN FERNANDO, LA UNION – Pinarangalan ang mga probinsya ng La Union at Pangasinan sa Rehiyon1 para sa kanilang nagawa sa larangan ng agrikultura.
Tinanggap ng dalawang probinsya ang parangal sa katatapos na 2016 Rice Achievers Award sa Philippine International Convention Center (PICC), Pasay City.
Ang La Union at Pangasinan ay nangibabaw matapos ang pagsusuri at pagsasala ng National Screening and Evaluation Team (NSET) ng Department of Agriculture (DA) sa mga probinsya base sa kanilang Provincial Rice Program (PRP) noong 2016.
Maliban dito ay dumaan din ang mga probinsya sa sunod-sunod na panel interviews at validations upang mapatunayan ang kanilang naiambag sa suplay ng bigas, na natagpuang umaabot sa kabuuang 72 porsyento sa buong rehiyon.
Sinabi ni Governor Emmanuel Francisco R. Ortega III ng La Union, “This national recognition to the province is the fruit of our teamwork and a re-focused planning and implementation for our agricultural programs.”
“While we are truly proud to have joined the other outstanding provinces in rice production, we shall sustain and further elevate our position as the one of the lead provinces in terms of the rice program,” aniya.
Samantala, nauna nang inihayag ni Pangasinan Governor Amado I. Espino III na ginagawa ng probinsyal na gobyerno ang makakaya nito upang patuloy na ipatupad ang mga programang inilunsad ng nakaraang administrasyon. Nangako ito na kaakibat ng kasalukuyang programa ay bubuo pa ng mga hakbang upang maisulong ang probinsya ng Pangasinan na maging agro-industrial area sa mga susunod na taon.
Maliban sa La Union at Pangasinan, ang ibang top rice-producing provinces ay Nueva Vizcaya, Nueva Ecija, Compostella Vallley, Bulacan, at Lanao del Norte.
Ang pitong awardees ay tumanggap ng trophy at P4 million na cash prize na magagamit sa iba’t ibang programa upang mapabuti pa ang agrikultura sa kani-kaniya nilang nasasakupan.
Ngayong taon ay ika-apat na beses na tinanggap ng Pangasinan ang naturang award habang unang beses naman ng La Union. Anne Hazel Fajardo-Flores/PIA-1 / ABN

Amianan Balita Ngayon