La Union police agbantay ti pagserkan, pagruaran iti merkado ti San Fernando

April 19, 2020 Headlines

SIUDAD TI SAN FERNANDO – Rinugianen iti La Union Police Provincial Office (LUPPO) iti panakapaipatungpal ti estratehia nga ‘One Entry, One Exit Pass’sadiay auxiliary wet market iti daytoy a siudad.
Nangrugi idi Abril 13, sinublat iti puersa ti pulis iti panangimaton ti pagserkan ken pagruaran iti tiendaan tapno maipasigurado nga dagiti pagalagadan ti enhanced community quarantine ket suruten iti tattao.
Sigun kenni Lt. Col. Silverio Ordinado, pannakangiwat iti LUPPO, binilinan ni Interior Secretary Eduardo Ano iti police ken militar nga bantayanda dagiti publiko a tiendaan kas maysa a pamay-an tapno malappedan iti panakaiwaras ti coronavirus disease 2019 (COVID-19).
“Panggep daytoy nga maorganisa, taginayonen iti kinaurnos, ken panakaipatungpal ti social distancing iti tiendaan,” kuna ni Ordinado.
Iti biangna, binigbig ni San Fernando City Mayor Alfredo Pablo R. Ortega iti baro a direktiba nga panagserra kadagiti tiendaan nga maaddaan laeng iti maysa a pagserkan ken pagruaran.
Pinaregtana met dagiti umilina nga agtungpal iti baro a bilin. “Umamangak kada tunggal-maysa kadakayo, patpatgek nga kailian nga ipangagyo iti amin nga pagalagadan ken pagannurotan,” kuna ni Ortega.
Innayonna nga araramiden iti gobierno ti siudad iti amin nga kabaelanna nga mangtaming iti pandemia. “Ma ngin anam akayo, sisisinged a makitartrabaho kami kadagiti umno nga autoridad tapno maipasigurado nga kanayon nga maipaaymi dagiti pudno a solusion maipanggep iti COVID-19,” kuna iti mayor.
JPD-PIA-LU/PMCJr.-ABN