Maagap at matalinong pagpaplano, kailangan ng lungsod

Muli ay nagulantang ang lungsod ng Baguio sa biglaang pagdagsa ng maraming bakasyunista matapos idiklera ni Pangulong Rodrigo Duterte na walang pasok sa buong Metro Manila mula Nobyembre 10 hanggang Nobyembre 15 dahil sa pagdaraos ng ASEAN Summit sa bansa. Mahigit 60 porsiyento ng mga sasakyan ang naidagdag sa mga lansangan ng Baguio lalo na sa Central Business District.
Dahil dito ay muling nagkukumahog ang mga lokal na awtoridad dahil sa makailang ulit ay nabigla ang mga ito sa pagdagsa ng napakaraming sasakyan at bisita na lalong nagpasikip sa masikip nang trapiko sa lungsod. Tunay na nagbigay perwisyo ang sitwasyon sa maraming residente ng lungsod at dulot ng pangyayari ay napilitan si Mayor Mauricio Domogan na kanselahin ang pasok sa pre-school  hanggang high school noong Martes at Miyerkules, Nobyembre 14 -15, dahil nga sa malalang trapiko at walang masakyan ang mga mag-aaral, at kung mayroon man ay usad-pagong naman ang mga ito. Pati mga empleyado at trabahador ay napinsala ang kanilang trabaho.
Tila hindi na nga natuto ang mga awtoridad sa maagap na pagpaplano at paglalatag ng daglian at alternatibong solusyon sa mga ganitong hindi inaasahang sitwasyon (bagama’t may pauna ng pahayag ng pagsuspinde mula Malacañang). Kung maaalala ay ilang buwan pa bago ang ASEAN ay nagpalibot na ng mga pahayag at impormasyon ukol sa malaking aktibidad sa bansa na dapat ay nabigyan ito ng halaga at konsiderasyon dahil nga sa maaaring pagkansela ng mga pasok. Hindi na yata naisip ang salitang “anticipation”. Dalawang araw na walang pasok ang mga mag-aaral at baka nga nadagdagan pa ito dahil tinamad nang pumasok ang ilan, mga empleyadong hindi na nakapasok o nahuli sa mga trabaho na bawas sahod, mga tsuper ng taxi at jeepney na nadiskaril ang pasada at mga negosyong naperwisyo di man direkta ay naapektuhan din ang kita. Maliban pa sa tone-toneladang basurang naidagdag sa bunton ng problema sa lungsod – lahat ito ay dulot ng ganitong sitwasyon.
Masuwerte nga ang lungsod dahil pangunahing destinasyon ito tuwing may bakasyon at kung kita nga ang pag-uusapan ay nawa’y maging makatotohan, ang makikinabang naman ay ang lungsod. Mainam ang masigabong turismo subalit kung ang kapalit naman ay ang hindi pagpasok ng mga mag-aaral, ng mga empleyado at trabahador, lalong paglubha ng trapiko, pagdumi ng lungsod at ilan pang epekto rito ay mukhang hindi yata katanggap-tanggap ito.
Gaya ng isang supot na sa pagnanais nating mapuno at pilit punuin pa ay baka sumabog na ito at pumutok at huwag na sanang maulit na dahil lamang sa pagtanggap natin ng mga bisita ay magsakripisyo naman ang lokal na mamamayan lalo na ang mga mag-aaral . PMCJr.

Amianan Balita Ngayon