Maika-7 Ayat Festival, mangrugi no Setiembre 15

September 3, 2017 Headlines

LA UNION – Iti tema a “Sangsangkamaysa a Panagpitik Dagiti Puso nga Agay-Ayat iti La Union,” marambakan ti maika-pito nga Ayat Festival ita a tawen mangrugi inton Setiembre 15.
Kangrunaan nga itantandudo ti nakuna a piesta ti lengguahe nga Iloko babaen kadagiti aktibidad nga Ilokano Chorale Competition, Iskrabiloko (Iloko Scrabble Tournament), La Union Henio (Iloko version ti Pinoy Henio), Salip ti Deklamasion, Street Dancing Competition, ken panangited ti Kampeon ti Lengguahe Award.
Maisayangkat ti elimination round ti La Union Henio ken ti Street Dancing Competition kas paset ti panglukat nga aktibidad inton Setiembre 15 idiay Agoo Civic Center, Agoo, La Union.
Setiembre 19 ti Iskrabiloko sadiay Don Pacoy Gym, kagiddan ti Salip ti Deklamasion ken ti Ilokano Chorale Competition a maangay iti Diego Silang Hall, Provincial Capitol, Siudad ti San Fernando, La Union. Amin a mangabak iti elimination round ket aglayon iti final round ken awarding ceremonies no Oktubre 11, 2017.
Nagutugot amin a local government unit iti probinsia a mangisayangkat kadagiti bukodda a pasalip iti Ayat Festival. Dagiti nangabak tunggal munisipio ti mangibagi kadagiti LGUs iti provincial level.
Daytoy nakuna a pagteng ket imatunan ti probinsial a gobierno ti La Union iti panangidaulo ni Gov. Francisco Emmanuel “Pacoy” R. Ortega III kas panagtungpal iti Implementing Rules and Regulations ti Sangguniang Panlalawigan Ordinance No. 026-2012 wenno Local Language Code of La Union.
Gagara ti Ayat Festival nga itag-ay ti lokal a lenguahe ti La Union, kultura, ken talento dagiti umili, kagiddan ti pannakarambak ti Tourism month iti Setiembre ken ken Culture month iti Oktubre. ARNEL O. MAMARIL, PITO-LU / ABN