Martial Law, Duterte style

Hellooo, hellooo, naimbag nga oras kadatayo amin kakailian. Addakam manen nga umay maki-abrasa ken makinnistoria kadakayo babaen iti ABN. Nupay nagkas-ang ti nagbanagan dagiti kailian tayo iti umabagatan a paset ti pagilian particular iti Marawi City, Kayong, agtuloy latta a kunada ti panagtayyek ti lubong wenno biag. Life must go on a kunada. Ngem ti aramiden tayo ket isu ti panangikarkararag tayo iti kararua dagitoy a nagbalin a biktima ti kinaranggas ti pada a pinarsua ti Dios. No apay ketdi a kasta. Uray koma nagduduma ti pammati tayo, saan tayo koma nga aga-apa ta agpapada tayo met amin a pinarsua ti Dios a mannakabalin amin.

Alla, Kayong Angkuan, ammom kadi a ti maysa kadagiti kakas-angan ket isu ti naipadamag a pananguramda iti maysa a dakkel a Christian School iti nasao a siudad. Segun pay iti nakalap nga impormasyon, kasla narigaten a ma-revive ti nasao a pagadalan agsipud ta dakkel ti damage na. Dagitoy a paspasamak ken riribuk ti nanggapuan ni President Duterte a nangipaulog iti Martial Law iti Mindanao ngem kas iti sigud, manamnama nga adu ti nag-react. Adu ti nangbatikos iti Presidente iti daytoy nga impaulogna. Dagiti senador kas kada congressman a pakairamanan dagiti nagduduma a grupo. Ninamnama lattan dagiti managpaliiw a baitikos ti lak-amen ti Duterte administration. Ngem, no daytoy ti makapatalna iti nasao a lugar ken manggibus iti riribuk apay ketdin a saan.

Nupay adu dagiti nangdillaw iti daytoy nga inaramid ti Presidente, adu met dagiti pabor iti daytoy ta nalabes met ngaminen ti riribuk iti nasao a lugar. No mnalagipyo ti pakasaritaan ti pagilian…adu ti nangkondena idi iti daydi nag-Presidente Marcos gapu iti panangipaulogna iti Martial Law iti daydi a panawen, adda met kabukbukodanna a rason no apay nga inaramidna ti kastoy. Ta nakaro idi ti kinariribuk. Ngem, segun met kadagti dadduma a managpaliiw na-plano dagiti kalabanna dagitoy a riribuk tapno madadael ti nagan daydi Marcos tapno mapadisida ket masublatda ti takem. Ket, swak na swak, three points pay kailian… Kayatko a sawen, nagballigida.

Napadisi daydi Apo Marcos, na-exile idiay Hawaii. Nagbalin ngarud a kontrobersial dagitoy ket naimaldit payen iti pakasaritaan ti pagilian tayo. Ngem ti dakesna ket saan a nagsardeng ti pannakakondenar daydi Marcos nga agingga iti natay, pannakayawid ti bangkayna nga agingga iti naitabon ti bangkayna iti Libingan ng Mga Bayani iti saan pay unay a nabayag. Ket ita adtoy ti kabarbaro a Presidente a nagipaulog manen iti Martial Law ngem, pagimbaganna ta idiay laeng pasetna ti Mindanao, saan ketdi intero a pagilian.

Dagitoy ti maysa kadagiti isyu a a nadagsen a sangsanguen ti Duterte Administration, Kayong Angkuan, ken no kasano a maparmek dagiti rebelde a mangrirriribuk iti sumagmamano a paset ti Mindanao particular iti Marawi City. Ti makapaladingit isu ti kaadun dagiti inosente nga umili a nagbalin a biktima. Napapanaw da iti lugarda, nadadael ken nauram dagiti pagtaenganda kangrunaan ti amin adun ti naipatli a biag.

Opsss, dakesen Kayong Angkan, naglabesak sa manen iti oras a naited kaniak nga umay ditoy makitamtambay kadakayo. Ungtannakto man la ngatan ni Sofing, abusta diak pay nagatang tay manteka ken sibuyas kas kada bawang a pagatgatangna. Ala kastan, tangay saantayo met a nagkakapet, agsisina tayon… babayooooo….tsuptsuo muah muahh…!

Sirmata ken Tagtagainep ni Mang Gusting

Amianan Balita Ngayon