May kahihinatnan ba ang IPRA sa kabuuan?

November 4, 2017 Editorial

Dalawampung taon na ang nakalipas mula nang ipatupad ang Republic Act 8371 o ang Indigenous People’s Rights Act (IPRA) ay pinaniwalaang magbubukas ito ng mas higit na oportunidad para sa mga katutubong Pilipino at mabigyan ng kapangyarihan ang komunidad na dating itinuturing na mahina at mababa.
Maaaring sa loob ng dalawampung taon ng pagkakaroon ng IPRA ay nagising ang pambansang kaunawaan na humuhubog ng isang kulturang rumerespeto sa Indigenous Peoples (IP) at sa kanilang mga kaugalian at paniniwala. Unti-unting nakilala at tinanggap ang mga katutubo, nabawasan ang diskriminasyon at nabigyang-pansin ang agwat na dating umiiral sa mga Pilipino na hinahati ng iba’t ibang kultura.
Nabigyan ng oportunidad ang mga IP sa pangkabuhayan, sa edukasyon at nabigyan ng pagkakataon na mapalakas ang kanilang kapasidad at potensiyal sa pangunguna upang makalikha ng positibong pagbabago at makabuluhang pag-unlad sa mga komunidad ng IP’s.
Napakagandang pintuan at oportunidad ito para sa mga katutubo na halos siyam na taon ding mainit na pinagdebatehan at maraming pagbabago sa kongreso ang IPRA subalit isa sa pangunahing rason ay ang panawagang respetuhin ang “ancestral domain” ng mga katutubong tribo, kilalanin ang mga hangganan ng ancestral domain at ihiwalay ito sa public domain. Sa madaling salita ay ibigay sa kanila (IP) ang pag-aari sa kanilang minanang lupain.
Subalit tila nanganganib pa rin ang karapatan ng mga katutubo dahil sa nais ng ilan na muling tawagin silang pambansang minorya sa kabila ng ipinaglaban na tingnan at tawagin silang Indigenous Cultural Communities/IPs at sa Cordillera ay malaking problema pa rin ang usaping ancestral domain na balak muling ipamahagi na wala naman sa usapan ng malikha ang batas ng IPRA.
Nasa kabuuang 14 milyon na IP’s sa bansa at maliit na bahagi lamang nito ang nakakaalam tungkol sa IPRA at kapag nanatili ito ay magiging mahina ang pagkakaisa ng mga katutubo upang ipaglaban ang kanilang karapatan kahit pa ginarantiyahan ito sa ilalim ng batas. Wala nga namang silbi ang batas kahit pa alam natin ito kung hindi naman natin tarok ang mga napapaloob sa batas na ito. May hawak nga tayong baril subalit wala namang bala ito.        PMCJr