Nangyari sa Marawi, sino ang dapat sisihin?

November 4, 2017 Daplis Walang Mintis Opinion

Tapos na ang giyera sa Marawi. Nagkalasug-lasug na nga eh. Wasak na wasak na ang mga kabuhayan ng mga apektadong residente. Maraming buhay ang nagbuwis. At sa kasalukuyan, may mga terorista pa ring naiiwan at lumalaban sa mga otoridad. Di man kalakihan ang banatan, masasabi nating humupa na ang giyera. Tapos na ang bombahan. Tapos na din kaya ang pangamba? Palagay namin, hindi pa. Malayo pa ang hahantungan ng pangambang yan. Pangambang baka muli silang makabuo ng Maute-Isis group. Pangambang hindi na sila makakabawi sa kanilang mga nawalang kabuhayan at pangambang malilimutan sila kahit hindi pa tapos ang tunay na rehab. Pero sandail lang, pards, sino ba kasi ang dapat sisihin sa nangyari sa Marawi?

*****
Ayon kay Pres. Duterte, bago ang 2-day mission niya sa Japan, aakuhin niya ang lahat. Ibig sabihin, handa siyang panagutan ang nangyari sa Marawi dahil siya ang nag-utos na durugin ang mga terorista. At sa pagdurog sa mga teroristang Maute-Isis, kasamang nadurog ang maraming bahay, negosyo at buhay. Matigas ang kanyang paninindigan na aakuhin at pananagutan niya ang naganap na giyera dahil kagustuhan niyang wakasan ang terorismo sa naturang lugar. Kaya nga idineklara niya ang Martial Law sa Mindanao upang masupil ang terorismo sa naturang rehiyon. Alam niya kasing matagal na panahong mga terorista ang sakit at salot sa pag-unlad ng Mindanao. Kaya ngipin sa ngipin, lakas sa lakas na ang ginamit. Tagumpay naman sa Marawi bagama’t marami ang nasawi at nasirang kabuhayan. Ngunit mas matimbang ang katahimikan at pagkadurog ng mga terorista alang-alang hindi lang sa Mindanao kundi para sa buong bansa sa darating pang panahon.

*****
Sabi ng ilan, si Digong daw ang dapat sisihin sa nangyari sa Marawi. Bawi naman ng marami: siya ba ang nagdala ng mga Maute-Isis sa Marawi? Hindi ba’t may mga Maute na noong panahon ng mga nakalipas na administrasyon? Ano ang kanilang ginawa? Bakit nila hinayaang nagpalaki ng puwersa ang mga terorista? Kung sana nadurog na ang mga ito, wala ng problema si Pres. Duterte, di ba? Tama si Digong nang tanungin niya kamakailan: papaano nakapasok ang mga teroristang Maute-Isis sa Marawi? Kung walang nagpapasok at tumulong sa kanila, may siege bang naganap? Tsk tsk, di dapat humantong sa sisihan. Ginampanan lamang ng isang pangulo ang kanyang tungkulin na iligtas ang kanyang mamamayan sa kuko ng mga terorista. Hindi lang para sa kanyang termino ito kundi para din sa sumusunod na termino at lahi ng bansa. Hindi niya pinalala ang sitwasyon kundi gumawa siya ng dapat na aksiyon at pagkilos upang supilin ang mapanirang terorismo. Ang kaso, lumalabas na siya raw ang may sala.

******
May namuo raw na clamor kamakailan. Na ano? Kakasuhan daw (class suit) ng mga residente ng Marawi si Digong dahil sa sinapit nila nang magkagiyera. Giyera daw ni Digong ito laban sa mga terorista, at hindi raw sila (residente) dapat madawit at maging biktima ng madugong giyera. Ipaglalaban daw nila ang kanilang karapatan kontra gobyerno. Ayon naman kay Duterte, may karapatan ang bawat mamamayan sa Marawi sa kanilang plano. Pero dagdag ng pangulo: handa niyang harapin ang lahat. Daplis naman ng mga analyst: nang giyerahin tayo ng Japan at maraming buhay at kabuhayan ang nagbuwis, anong ginawa ng gobyerno ng Japan? Hindi ba’t hanggang sa ngayon, nagbabayad pa rin ang nasyong ito sa pamamagitan ng iba’t ibang assistance sa ating bansa. Hindi tinukoy kung aling lugar ang dapat bayaran kundi bansa na ang usapan. Ibig bang sabihin na hindi indibidwal ang usapan sa mga biktima ng giyera sa Marawi kundi buong lungsod ang usapan kung rehab ang basehan? Magulo pa rin ang lahat. Abangan na lang natin ang susunod na kabanata. Adios mi amor, ciao, mabalos!