Mga Muslim, nakipagtulungan sa pulisya ng Bauang

July 2, 2017 Provincial

BAUANG, LA UNION –  Dahil sa patuloy na bakbakan ng mga rebeldeng Muslim at mga sundalo sa Marawi City, Mindanao ay marami na rin ang naiipit na mga sibilyan na mga Muslim ang nais umalis sa kanilang lugar.

Kaya tiniyak ni Bauang Mayor Eulogio Clarence Martin P. De Guzman III na pinakilos ang mga kapulisan para i-monitor ang lahat ng barangay na kung saan mayroong mga kapatid na Muslim ay kailangan makausap at mapalista para alamin at kilalanin ang kanilang mga background kaugnay sa mga kamag-anak na kung may nasasangkot man na kabilang sa mga rebelde sa Mindanao ay dapat agad na malaman upang para na rin sa kaligtasan ng bawat isa sa mga barangay.

Sinabi ni De Guzman, “Bagama’t maliit lamang ang bilang ng mga kapatid natin sa Muslim na nasa 28 lamang sila ngunit kailangan pa rin masiguro natin na walang nakakapasok sa ating bayan na hindi naipapalista o ipinakikilala sa awtoridad ng kapulisan, kailangan rin na makipagkaisa sila para sa ikakapanatili ng kapayapaan sa ating bayan.

“Isang makakatulong na mamo-monitor natin ang lahat ng barangay sa 24/7 na pagpapatrolya ng mga naka-assign na pulis kasabay na rin ang mga naka-install na CCTV sa mga barangay.

“Sinisiyasat rin ng mga pulis ang mga liblib na mga lugar kung may makita man na mga kahina-hinalang tao na hindi pa kilala na iba ang ikinikilos ay inoobliga na sitahin ito o tanungin kung taga-saan at ano ang pakay nito sa lugar na kanyang tinutuluyan.

“Isang paraan ito upang maiwasan na maging taguan ang bayan natin  ng mga terorista at ang pag ingatan natin na kahit maliit na grupo lang ang makapasok sa ating bayan ay kung may mga malalakas na armas silang hawak ay posibleng makakagawa sila ng karahasan sa atin, na huwag naman sana ipahintulot.

“Kaya nananawagan ako sa ating mga kababayan na Bauangenos na makipagtulungan kayo sa amin, ipagbigay alam agad kung may nakikita kayong ibang tao na hindi pamilyar o kilala sa inyong lugar ay agad ninyo i-report sa himpilan ng pulis upang sila ang bahalang humarap at tanungin sa ilang impormasyon na dapat malaman,”  ani De Guzman. ABN