MGA NABUBUHAY NA BAYANING GURO ATING ALALAHANIN

September 16, 2023 Editorial

Ilang grupo ng mga pampublikong guro ang muling nanawagan sa gobyerno na ibaba ang kanilang optional retirement age sa 57 upang mapakinabangan at matamasa nila ang kanilang pagtatapos sa trabaho ng lubusan habang sila ay malakas pa. Ang panawagan ay kasabay ng pagdiriwang ng World Teachers’ Month na ginugunita tuwing Setyembre 5 hanggang Oktubre 5. Noong Enero ay inaprubahan ng House of Representatives sa ikatlo at huling pagbasa ang panukalang batas sa retirement age ng mga manggagawa ng estado mula 60 sa 56 taonggulang.

Ang House Bill No. 206, o ang “Act lowering the optional retirement age of government workers from sixty years to 56 years, seeks to amend Section 13-A of Republic Act 8291, o ang “The Government Service Insurance System Act of 1997.” Gaya ng sinasabi sa panukalang batas, ang isang manggagawa ng gobyerno at isang kuwalipikadong miyembro ng GSIS na piniling mag-retire sa edad 56 ay may karapatan sa mga retirement benefit kung siya ay nakapagserbisyo ng kahit 15 taon at hindi tumatanggap ng isang buwanang pension para sa permanent total disability.

Ayon sa mga may-akda ng panukalang batas, ang hakbang ay upang ibaba ang optional retirement age ng mga government workers na magiging kapantay ng mga miyembro ng military at police na may mandatory retirement age na 56. Nanawagan din ang mga guro para sa pagtaas ng sahod, pagbawas sa mga oras n kanilang trabaho, itaas ang kanilang medical benefits, at pagbibigay ng hazard pay, at iba pang mga isyu. Maraming mga guro ang pumapasok sa propesyon, sa kabila ng medyo mababa ang suweldo, na inaasahang maaalagaan sila sa kanilang pagreretiro sa pamamagitan ng kanilang pension.

Subalit tila ang pangakong iyon ay hindi natutupad. Sa katunayan, dahil sa patuloy na pagtaas
ng halaga ng pangangalaga sa kalusugan, ang mga nagretiro na ay nasasagad dahil sa mababang
pension, taliwas sa paniwalang kahit hindi sila nakaipon ng malaki sa pagiging guro ay masisiguro sila ng kanilang pagreretiro. Mali ang akalang kapag nagpepensiyon ka na ay makakaluwag ka na. Ang mga insentibo sa maagang pagreretiro ay naging popular sa mga nakalipas na ilang dekada
bilang istratehiya sa pagtitipid, kung saan ang teorya ay palitan ang mga bihasa, mas mataas na
sahod na mga guro ng mas bata sa mas mababang mga sahod ay mababawasan ang
pangkalahatang gastos.

Ang pagsusulong ba ng mga polisiya sa maagang pagreretiro ay makakatulong na protektahan ang mga guro at badyet? Panahon na upang ang opisyal na pagkilala at mga pribilehiyo ay maibigay sa mga nabubuhay na mga bayani ng ating panahon. Ang mga guro ay ang pangunahing instrumento ng kaalaman, katunayan na karamihan ng edukasyon ng kabataan ng bansa ay lubos na umaasa sa mga pampublikong paaralan dahil sa mabigat na pasaning pinansiyal na ipinapatupad ng mga
pribadong paaralan.

Katotohanan na sa nakaraang dekada ay nakaranas ang bansa ng tinatawag na “brain drain” lalo na sa larangan ng pagtuturo. Dahil sa kulang na suweldo at kakulangan ng mga benepisyo na ibinibigay ng gobyerno ay daan-daan kung hindi libo-libong guro ng ating mga pampublikong paaralan ay pinipili ang mas marangya sa pangingibang bansa. Ang gawing ito ay nakakabalam kung hindi man nagpapalugmok sa programang pang-edukasyon ng bansa.

Kung hindi ito bigyan-pansin at agapan ay magpapatuloy ay problema kung saan ang antas ng
kamangmangan ng bansa ay tataas. Kailangang paghusayin ang kalagayan ng mga guro sa pagsusulong ng mga benepisyong ibinibigay, dahil kung masaya at kuntento ang mga guro ay mas maraming mga kabataan ang makakaranas ng de-kalidad na eduaksyon sa mababang halaga.