Mismanagement ng Burnham Park, pinabulaanan

November 10, 2018 Metro BLISTT

Iginiit ng pamahalaang panlungsod na ang Burnham Park ay hindi pinabayaan ng lokal na gobyerno sa mahigit dalawang dekadang pangangasiwa nito sa 34 ektaryang parke.
Ito ang pahayag ni Mayor Mauricio G. Domogan tungkol sa aniya ay maling pananaw na nabigo ang lokal na gobyerno na pangasiwaang maayos ang pangunahing tourist destination sa lungsod.
Binigyang diin ng mayor na dapat ay masusing pag-aralan ng lokal na konseho ang magiging epekto ng nakabinbin na resolusyon na nagbabalik ng pangangasiwa sa Burnham Park sa national government.
“We already had a bad experience when the park was under the administration of the national government through the National Parks Development Committee that is why we lobbied for its turnover to the local government so that we will be able to properly look into the development activities that is supposed to be undertaken pursuant to existing rules ad regulations,” aniya.
Sa ilalim ng Executive Order No. 224, series of 1995 na nilagdaan ni dating Pangulong Fidel V. Ramos ay ipinasa ang administrasyon, pamamahala at operasyon ng Burnham Park sa lungsod, sa kagawaran ng turismo at sa nalansag nang Philippine Tourism Authority (PTA) at ngayon ay Tourism Infrastructure and Enterprise Zone Authority (TIEZA), na kailangang maglaan ng taunang subsidiya na umaabot sa P18 milyon sa lokal na gobyerno para sa patuloy na operasyon ng parke.
Ngunit, inihayag ng mayor na ang subsidiya ay ilang taon lamang nasunod at matagal nang itinigil sa hindi malinaw na dahilan na nagbunsod naman upang gumastos nang malaki ang pamahalaang panlungsod sa pangangasiwa ng parke hanggang ngayon.
Aniya, ang lokal na gobyerno ay gumagastos ng tinatayang P42 milyon para sa administrasyon, pangangasiwa at operasyon ng naturang parke kada taon ngunit kumikita lamang ito ng P18 milyon sa operasyon ng kasalukuyang konsesyoner na hindi sapat upang matugunan ang tumataas na gastusin para sa parke.
Ipinaliwanag nito na kung masusunod lamang ang probisyon na nagbibigay ng kapangyarihan sa lokal na pamahalaan na gamitin ang operasyon ng mga kinilalang income-generating areas sa parke ay matutustusan ang operasyon ng parke at maipapatupad ang mga ninanais na improvement na makakatulong upang mapanatili ang tanawin sa parke na madalas na pinupuntahan ng mga turista sa lungsod.
Sa kasalukuyan ay pinag-aaralan ng konseho ng lungsod ang merito ng mungkahing resolusyon na nagnanais na maibalik ang administrasyon, pamamahala at operasyon ng Burnham Park sa national government upang masiguro ang sustainability dahil sa diumano ay pagkabigo ng lokal na pamahalaan na gawin ang bahagi nito sa pangangasiwa sa parke at mga pasilidad dito.
Nagbabala ang mayor na ang pagbabalik ng pangangasiwa sa Burnham Park sa national government ay magreresulta sa mas seryosong problema kaysa masolusyunan dahil ang concerned agencies ay siguradong ipaggigiitan ang kanilang kagustuhan kontra sa kung ano ang inirekomenda sa mungkahing master development plans para sa parke na binuo ng mga responsableng stakeholders na ang layunin ay ipreserba ang kalagayan ng mga pasilidad para sa mga residente at turista. BAGUIO PIO / ABN