Publiko hinimok intindihin ang anti-profanity ordinance

November 10, 2018 Metro BLISTT

Umaapela ang pamahalaang lokal sa mga residente at bisita sa lungsod ng Baguio na pahalagahan at intindihin ang layunin ng anti-profanity ordinance.
Katwiran ni Mayor Mauricio G. Domogan, layon ng naturang ordinansa na linangin ang asal at ugali ng kabataan upang lumaki ang mga ito bilang responsableng mamamayan sa halip na problema ng lipunan.
Sinabi ng mayor na nakakatanggap ito ng maraming tawag mula sa iba’t ibang local, national at international media outfits na nagtatanong tungkol sa implementasyon ng anti-profanity ordinance na nalagdaan noong Setyembre 24,2018 at nagsimulang ipatupad noong Oktubre.
Aniya, batay sa probisyon ng Ordinance No. 118, series of 2018 na iniakda ni Councilor Lilia Fariñas, ang sakop ng ordinansa ay ang mga estudyante sa high school at college na kadalasang nagpupunta sa mga pampublikong lugar gaya ng paaralan, cafeterias, computer shops, arcades at mga kaparehong establisimyento.
Sinabi niya na bagaman ang ordinansa ay walang penal provision o mabigat na parusa, responsibilidad ng mga opisyal ng kanilang paaralan na bantayan ang kanilang mga estudyante sa loob ng paaralan upang gumalaw ang mga ito nang naaayon sa katanggap-tanggap na pamantayan.
Paliwanag ng mayor, may autoridad ang paaralan na magpataw ng parusa sa mga estudyanteng mahuhuling lalabag habang nasa loob ang mga ito ng kampus.
Sa kaso naman ng business establishments, sinabi ng mayor na obligasyon ng mga negosyante na maglagay ng babala sa kanilang mga establisimyento na magsisilbing gabay ng mga tao na huwag magbigkas ng anumang salita ng pagmumura na maaaring makasakit sa iba pang taong nakakarinig.
Sinabi ng mayor na moral obligation ng mga magulang at nakatatanda na tignan ang ikabubuti ng kabataan sa pamamagitan ng pagtuturo ng wastong asal at ugali habang bata pa sila.
Iginiit niya na ang karapatan sa malayang pagpapahayag na nakasaad sa konstitusyon ay hindi ganap dahil may mga limitasyon ito kaya hindi ito maaaring gamitin para salungatin ang layunin ng anti-profanity ordinance.
Aniya, mainam pa rin na ituwid ng mga magulang, guro at nakatatanda ang maling asal ng mga bata.
Umapela ito sa mga residente na basahin muna ang nilalaman ng ordinansa upang maintindihan nang maigi ang layunin nito bago maglabas ng komento.
Sinabi ng mayor na ang mga nagkokomento sa social media na pumupuna at kumokontra sa naturang ordinansa ay hindi muna ito binasa bago nagbigay ng komento. BAGUIO PIO / ABN