Mt. Pulag at Sagada, sarado; iwasan muna ang mamasyal – CDRRMC

LUNGSOD NG BAGUIO – Nagbabala ang  Cordillera Regional Disaster Risk Reduction Management Council (CDRRMC) noong Hulyo 28 (Biyernes) na iwasan muna ang pamamasyal sa iba’t ibang spelunking at hiking sites sa rehiyon dahil sa banta ng landslide at flashfloods.
Sinabi ni Office of Civil Defense-Cordillera Regional Director Andrew Alex Uy, chairman ng CDRRMC, na kinansela na ng bayan ng Bokod, Benguet lahat ng hiking activities sa Mount Purgatory at Mount Pulag hanggang Linggo.
Kinansela na rin ng Sagada ang lahat ng naitakdang pagbisita sa Lumiang at Sumaguing caves mula noong tanghali ng Biyernes dahil sa walang habas na pag-ulan.
Maaalalang ang Korean hiker na si Choi Sungkyu, 56, ay masuwerteng nabuhay bagaman lubhang nanghihina nang natagpuan sa Latang, Barlig, Mountain Province matapos ang mahigit isang linggong search and rescue operations noong Hunyo.
Nito lamang Hulyo 18 ay natagpuan naman ang bangkay ng 23-anyos na tour guide na si Roderick Malecdan halos dalawang araw matapos na tangayin ito ng rumaragasang tubig habang nasa loob ng Victoria Cave sa Sagada, Mountain Province kasama ang ilan pang tour guides na pawang nakaligtas.
Ayon kay Uy, ang pagsasara ng mga tourist destinations ay isang preventive measure lamang dahil sa malalakas na mga pag-uulan sa malaking bahagi ng Cordillera.
Nararamdaman pa rin sa rehiyon ang epektong dulot ng Habagat na pinatindi pa ng severe tropical storm “Gorio” na may international name na “Nesat”.
Iniulat din ng CDRRMC na ang Abra, Apayao, Benguet kasama ang Baguio City, at Ifugao ay nasa blue alert status.
Ayon sa Department of Public Works and Highways Cordillera (DPWH-CAR), ang Kennon Road ay bukas sa trapiko ngunit para sa seguridad ay pinapayuhan ang mga motorista na dumaan na lamang sa Marcos Highway o Naguilian highway.
Sarado rin ang mga kalsada ng Tabuk-Banaue Road (Dumanay Section in Tanudan) dahil sa clearing operations; Junction Talubin-Barlig-Natonin-Paracelis-Calaccad Road dahil sa rehabilitasyon ng Balabag Temporary Bridge, Talubin Side.
Ang ilang mga klase sa Baguio at Benguet ay kinansela 5am noong Biyernes. Idineklara ni Baguio Mayor Mauricio G. Domogan ang kanselasyon ng klase mula pre-school hanggang high school. Samantala, nagdeklara rin si Abra Governor Joy Bernos ng kanselasyon ng lahat ng klase bago magtanghali sa parehong araw. Liza T. Agoot / ABN

Amianan Balita Ngayon