Umuna a SOPA, inbitla ni Gov. Pacoy

July 30, 2017 Headlines

SIUDAD TI SAN  FERNANDO, LA UNION  – Inpadamag ni Gov. Francisco Emmanuel “Pacoy” R. Ortega III nga iti umuna a tawen iti panagserbina kas ama ti probinsia ket nakaawaten ti La Union iti 24 a pammadayaw ken pammigbig kabayatan ti umuna nga State of the Province Address (SOPA) daytoy idi Hulio 27, 2017 sadiay Saint William the Hermit Cathedral, ditoy a siudad.
Iti idudur-as ti economic dynamism, government efficiency, ken infrastructure, binigbig ti National Competitiveness Council (NCC) ti La Union kas 10th Most Competitive Province in the Philippines, ken 1st iti Amianan a Luzon. Pinadayawan ti Association of Tourism Officers of the Philippines (ATOP) ken ti Department of Tourism (DoT) ti La Union Surfing Break kas Best Tourism Event iti kategorya ti Sports, Adventure, Wellness. Nagkampeon ti probinsia iti search for the Cleanest, Safest, and Greenest Province, pammadayaw manipud iti Regional Development Council-Region1, ken maysa a Rice Achievers awardee, pammigbig manipud Department of Agriculture (DA).
Kinuna ti gobernador a transformative governance ti puso ti administrasionna. Amin a departamento ti probinsial a gobierno ti La Union (PGLU) ket nasertipikaran iti Quality Management System ti International Organization for Standardization (ISO). Kinuna na a mannakigayyem nga agserserbi dagiti empleado ti PGLU para kadagiti umili. Nakipartner pay ti PGLU iti Institute for Solidarity in Asia (ISA) iti panangipatungpal ti Performance Governance System (PGS) tapno mapasayaat ti panangimaton, panangited ti serbisio, ken community living standards iti probinsia. Naawat pay ti La Union ti Seal of Good Local Governance (SGLG) manipud Department of Interior and Local Government (DILG).
Iti sirmata ti probinsia nga agbalin a Heart of Agri-Tourism in Northern Luzon by 2025, inpadamag ti gobernador a tallo a farm tourism sites ti naitedanen ti akreditasion ti Department of Tourism (DOT) ken Department of Agriculture (DA). Impaulogna metten ti direktiba para iti rehabilitasion ken operation ti multipurpose building kas La Union Agri-Tourism Center, a pakasapulan kadagiti produkto ti nagduduma nga ili ti La Union. Kinuna na pay nga iti pannakitinnulong ti La Union Honeybee Development Cooperative (LUBDCO), ti La Union Honeybee Center ket nanglukat manen ken adda napastreknan a P512,000 iti lima a bulan.
Kas panangituloy iti legacy ti napalabas a gobernador Manuel C. Ortega iti public service ken urnos ken kappia, pinapigsa ni Gobernador Pacoy ti krusada kontra maiparit a droga. Isuna tatta ti Vice President ti National Tokhang Advocacy Coalition (NTAC) iti Northern Luzon. Nagyaman ti gobernador ken kinablaawanna ti La Union Police Provincial Office (LUPPO), nga idadauloan ni PSSupt Leo Francisco, a nakaala ti 1st place iti 2016 Performance Evaluation Rating ti Police Regional Office I. Impaganetget ni Pacoy nga insurgency free ti La Union.
Iti emergency response ken disaster preparedness, rinibu ti volunteers iti probinsia ken addaanen ti 911 Public Safety Answering Point (PSAP) system. Iti social protection, amin nga ospital nga naipasidong iti PGLU ket PhilHealth accredited ken compliant iti Mother-Baby Friendly hospital initiative. Manipud idi Mayo 2017, 100% ti Senior Citizens iti probinsia ket PhilHealth registered.
Nakidar-ay iti SOPA 2017 dagiti Sangguniang Panlalawigan nga idadaulo ni Vice Governor Aureo Augusto Q. Nisce, dagiti heads ti line agencies, department heads ken empleyado ti PGLU, local chief executives, ken umili ti La Union.
Nagserbi a sangaili ken saksi ni Sen. Joseph Victor “JV” G. Ejercito. Marcel A. Florentino, PITO-La Union / ABN