Nabangsit a pagbabuyan, tinutukan ti SP committee ti LU

October 29, 2017 Headlines

SIUDAD TI SAN FERNANDO, LA UNION – Pinagtungtungan ti Sangguniang Panlalawigan (SP) Committee on Agriculture ti nasayaat a panangmanehar kadagiti pagbabuyan ken pagtaraknan ti manok iti probinsia kalpasan a nakaawat kadagiti report nga adda dagiti nabangsit a pagbabuyan ken pagmanukan a problema dagiti asideg a kabalbalayan.
Ti nakuna a committee hearing ket indauloan ni SP Member Bellarmin Flores II idi Oktubre 19, 2017 iti Provincial Capitol.
Nakipaset ditoy dagiti veterinarians, sanitary inspectors ken agriculturists ti 19 municipalities ken maysa a siudad ti probinsia ken dagiti nangibagi iti Department of Health Regional Office 1, Environmental Management Bureau Regional Office 1, ken Department of Environment and Natural Resources Region 1.
Ginutugot ni Flores dagiti nakipaset nga agsingasingda tapno mausar ti SP a mangputar iti linteg a magsolbar iti nasao a problema.
Kinunana pay a kasapulan daytoy iti arapaap ti probinsia nga agbalin a “center of agri-tourism in Northern Luzon by 2025”.
Sinigurado ti DOH-Region 1 kadagiti kameng ti komite a tinawen ti maisaysayangkat a training kadagiti municipal ken city sanitary inspectors maipapan iti panangipatungpal ti Sanitation Code of the Philippines.
Inparang met ti DENR1 dagiti addang para kadagiti poultry ken piggery tapno makaala ti Environmental Compliance Certificate (ECC) bayat nga inlawlawag dagiti sanitary inspectors ken agriculturists dagiti pamay-an iti inspection dagiti poultries ken piggeries.
Immunan a naisayangkat ti ocular inspection ti SP Committee on Health nga indauloan ni SPM Ruperto A. Rillera Jr. idi Setiembre 6, 2017, kabayatan ti bird flu outbreak iti Central Luzon.
Ti nakuna nga inspection ket maysa a preventive measure tapno masigurado nga awan ti bird flu iti probinsia. Gapu iti sumagmamano a negatibo a naduktalanda iti initial ocular inspection, napagnunumuan ti Committee on Agriculture ken dagiti municipal ken city sanitation officers, agriculturists ken veterinarians a mangipatungpal ti ocular inspection kadagiti poultry farms ken piggeries iti buo a probinsia. PITO-LU / ABN