NFA rice hanggang 3 kilo ang pwedeng bilhin

February 10, 2018 Metro BLISTT

Nagkaroon ng kasunduan sa pagitan ng National Food Authority at Market Outlets tungkol sa distribusyon ng NFA rice sa mga consumer noong ika-5 ng Pebrero, 2018.
Ayon sa kasunduan, lilimitahan lamang hanggang tatlong kilo ng bigas ang maaaring bilhin ng bawat consumer, ito ay upang mas maraming matulungang pamilya na may kakulangan sa budget.
Ipinaliwanag ni NFA Baguio-Benguet Provincial Manager-Cecilia Concubierta na ang pinaka-dahilan kung bakit bumaba ang nakaimbak na NFA rice ay ang kadahilanang ipinamahagi ito sa mga naapektuhan ng kalamidad sa buong Pilipinas gaya ng nangyari sa  Marawi at Albay.
Binigyang linaw din ni Concubierto na walang kinalaman ang pagtaas ng presyo ng commercial rice sa kakulangan ng NFA rice.
May kabuoang limang milyong sako ng NFA rice ang pinaghatian ng iba’t ibang sektor ng Pilipinas noong Agosto ng nakaraang taon, ang 65,000 na sako nito ay inilaan para sa lungsod.  Sa kasalukuyan, 14,400 na sako lamang ang natirang nakaimbak sa bodega ng NFA ngunit mas prayoridad nitong bigyan ang ahensya ng gobyerno para sa mga programa nitong pakain (feeding program). Gumawa ang NFA ng supervised selling kung saan tatlong sako lamang ng 50 kilogram ang puwedeng ibenta tuwing Lunes hanggang Biyernes at limang sako naman ng 50 kilogram ang puwedeng ibenta tuwing Sabado at Linggo. Ito ay limitado lamang sa hanggang tatlong kilo ang puwedeng bilhin ng bawat consumer. Ang mahuhuling lalabag na market outlet ay magkakaroon ng karampatang parusa na tinatawag na Perpetual Disqualification o temporaryong pagkawala ng karapatang magbenta ng bigas ng gobyerno.
Ayon sa NFA, hindi pa naaprubahan ang request nitong 250,000 metric tons. Madadagdagan lamang ang supply ng NFA rice kung may pag-aangkat sa ibang bansa sapagkat wala ng mabibiling lokal na bigas dahil hindi pa panahon ng anihan. Kristine Mae L. Pasyan, UB Intern / ABN