Operation baklas, part 2

March 10, 2018 Opinion Sirmata ken Tagtagainep ni Mang Gusting

Naimbag nga oras yo amin kailian ken kaarruba, adtoy manen ti nanumo a pagayamyo nga umay maki-abrasa ken makinnistoria ken makinnisem kadakayo babaen iti ABN. Sapay la koma ta pia ken nakaradkad latta ti adda kadakayo a sangbayan manen daytoy kolum tayo ket makaipaay kami manen iti ray-aw ken impormasion kadagiti mapaspasamak iti aglawlaw tayo. Saan koma ngarud a dagsensen iti barukong ti intay pasaren, Kakayong mi ida.

Sakbay man nga intay baklasen este rugyan toy kolum tayo kakayongmi ida, adtoy man pay ti ababa a parungiit este pakatawa, no makakatawa kayo, ah. Iti panagsango manen da chairman Gusting ken Jun a kumparena…

Jun: Inabaknak iti kallabes, Chairman Gusting ngem ita, daytoy ngatan ti saanmo a masungbatan. Kitaek man no pagpatinggaan ti laingmo.

Gusting: Deal latta, pare Jun. No kayatmo, pinnustaanta pay, ah.

Jun: Wen a, ti maabak isu ti mangala iti uppat sulina nga inumenta.

Gusting: Shoot pare Jun. Sige, ania dayta?

Jun: Manu ti tawen ni Apongmo?

Gusting: Pitu pulo ket innem, ket da apongmo a lakay ken baket, Pare. Mano met ti tawendan?

Jun: Ay, ket…addan, a—ammm…158, Chairman Gusting.

Gusting: Impossible met daytan, a… balbalatongennak manen a kunak, amangan no isuda met a dua ti kunam, Pare Jun?

Jun: Wen, met…isu met ti dinamagmo, saan aya, ti tawenda a dua!

Hahahahaa, naalaka met ita Chairman Gusting.

Okey, dats enap por da day este, that’s enough for the day kakayong. Iti napalabas a kolum tayo intay man dinaydayaw ti ar-aramiden dagiti barangay officials tayo a panag-Baklas Operation kadagiti car plate wenno plaka dagiti ilugan a nakaparking along city ken barangay roads iti lugarda. Napintas la unay dayta tapno adda serbi ti naipalawa wenno na-widening a kalkalsada ti siudad ta kas makitkitami ken napaliiwmi, kasla met naipalawa dagitoy tapno adda pagparkingan dagiti adda luganda!

Ano ba yan, ti dakesna, saan a madidigra dagiti kailian wenno kabarangayan tayo. Agparkingda latta, saan a bale koma no iti laeng rabii. Ken uray pay, saan aya nga adda linteg a dika maka-renew iti registration mo no awan garahem? Ngem, apay ngarud? Ngem sus maria kusina, aga-ammo tayon. Adda met tay garahe ni kumparem, di isu ti inka picturen ta no masadut to ni kapitan a mapan mang-inspect lalu no kumparem, nalpas ti ani, lusotka manen. Ngem apay awan nunotyo? Ammoyo la ngaruden a maiparit, aramidenyo pay laeng, makapasuron ania. Ket ammoyo, adda man mayat a remediona dayta. No koma ta makasarita tayo dagiti agvan-vandalism ania. Dagitay agpinpintura kadagiti padpader kas kada waiting shed, ta sumangka-otro met dagitoy a kibur este parikut ti siudad ta uray kapinpintura mapanda pintoraan iti no ania la ditan. Dagiti koma agmalmalem agpatpatnag a nakaparada a luglugan ti pinturaanda tapno awanen parikut. Segurado, dinton agparada pay dayta, saan met a husto daytoy ngem ania ngarud no isu ti makapag-panakem kadagiti welwel a kailian tayo kakayong. Saan aya?

Napaliiwmi, Kakayong, awan met binanagna ti panagbaklas da iti plakplaka ta adu latta met ti nakaparada nga uray busy time of the day a kunada, amomi a daytoy ket ordinansa ti siudad ti Baguio. No kasta, maipatungpal iti entero a siudad, adu dagiti agtungtungpal, adu met ti saan. Ken manu kadi nga aldaw ti interval ti operations yo kakayong a barangay officials? Ken, talaga kadi a dagiti laeng na-deputise a barangay officials ti aggunay, awan kaduada a kameng ti PNP? Ta ngamin ania, dagiti barangay officials, am-ammoda amin dagiti adda luganda iti barangayda ket natural, adda latta ti Kumpare-Kumare system tayo. Sus, Maria kusina, ania’t makunayo, Kakayong nangruna kenka kayong Angkuan? Di naman sa linalahat peru, sus ina aya…aga-amotayon!

Ne, ne, ne, Kakayong naimasantayo manen a kunak isu a baliwantay to manen, a. Kasta pay pare Jun, Editor Thom, agkakape tayo man no maminsan dita opisina, mailiwak met a maki-innistorya ken maki-igup iti kape kadakayo. Kasta pay, babayooo. Tsuptsup muahmuah.