Opisyales ng BJMP-Cordillera, sinorpresa sa drug test

October 14, 2017 Metro BLISTT

Nasorpresa ang mga opisyal ng Bureau of Jail Management Penology-Cordillera sa drug test na isinagawa ni BJMP Regional Director Atty Edgar Bolcio, habang isinasagawa ang 3rd Quarter Management Conference, noong Biyernes sa siyudad na ito.
“Sinadya ko talagang sorpresahin sila sa random drug test na ito, dahil ito ang tamang pagkakataon na nandito ang lahat ng mga warden at iba pang mga opisyales ng bawat BJMP ng siyudad at lalawigan ng rehiyon para sa aming conference,” pahayag ni Bolcio.
Aniya, gusto niyang linisin ang kanyang bureau para ipakita sa publiko na hindi lahat ay gumagawa ng masama, lalo na sa illegal drugs. “Ang random drug test na ito ay inumpisahan ko muna sa itaas at kasunod nito ay mga personnel naman.”
Ayon pa kay Bolcio, may kinalaman din ang drug test na ito sa pagkakasangkot ng isa niyang tauhan na si SJO1 Donald Kelly sa droga, na nahuli sa buy-bust operation kamakailan sa Session Road, Baguio City.
Aniya, ang insidenteng ito ay malaking kasiraan sa bureau, kaya minabuti niyang magsagawa muli ng drug testing sa kanyang mga tauhan. “Advise ko sa aking mga tauhan na umamin na lang kung sino ang gumagamit ng droga at magpa-rehab na lang, kaysa sa masibak pa sa serbisyo.”
Sa 52 opisyal ng BJMP-Cordillera na sumailalim sa drug test na isinagawa ng PNP Crime Laboratory Service ay nagresulta ito ng negatibo. “So far, nagpapasalamat tayo sa ating mga opisyal na negatibo sa droga at umaasa pa rin tayo na ganito rin sana sa mga iba pa naming tauhan sa rehiyon,” wika pa ni Bolcio. ZALDY COMANDA / ABN