OUTREACH PROGRAM ISINAGAWA NG KAPULISAN SA KANILANG ANIBERSARYO

September 30, 2023 Provincial

TUBA, Benguet

Sa pagdiriwang ng kanilang ika-9 na anibersaryo sa serbisyo ng pulisya, pinili ng mga miyembro ng Public Safety Basic Recruit Course (PSBRC) “MAGASAT” Class 2014-02 ang magdiwang sa
pamamagitan ng outreach program sa Kabuyao Elementary School, Kabuyao. Poblacion, Tuba, Benguet noong Setyembre 22. Ang nasabing aktibidad ay pinasimulan ng mga miyembro ng klase na itinalaga mula sa iba’t ibang unit ng Police Regional Office-Cordillera, sa pangunguna ni Lt. Christine Bullan, sa pakikipag-ugnayan sa Head Teacher 2 ng nasabing paaralan.

Bilang bahagi ng programa, ang mga miyembro ng klase ay namahagi ng mga meryenda, health kits, at medical supplies sa kabuuang 141 benepisyaryo, na binubuo ng mga daycare students at
Grade 6 pupils. Dagdag pa rito, tinuruan din ang mga mag-aaral sa mahahalagang paksa tulad ng
mga kampanya laban sa droga, anti-bullying, at tamang mga tip sa kalinisan. Ang nasabing aktibidad, na naaayon sa direktiba na, “Pagtupad at Pagmamahal sa Tungkulin,” ay naglalayon din na palawigin ang pangangalaga at serbisyo sa mga taong kanilang pinaglilingkuran habang ginagampanan ang kanilang mga tungkulin bilang mga pulis.

TFP/ABN