P378 milyon para sa school buildings, inilaan sa Baguio

November 18, 2017 Metro BLISTT

Kailangan nang maipamahagi ang mahigit P387 milyong pondo na nakalaan para sa rehabilitasyon, pagpapaayos, upgrade at konstruksiyon ng mga paaralan sa iba’t ibang parte ng lungsod upang maiwasang maibalik ito sa general fund sa susunod na taon.
Ayon kay Engr. Rene Zarate, district engineer ng Department of Public Works and Highways-Baguio City District Engineering Office (DPWH-BCDEO), na ang Special Allotment Release Order (SARO) ng pondo ay matatanggap ng ahensiya anumang oras upang ang mga proyektong school buildings ng halos 17 public schools sa lungsod ay maaari nang maisagawa sa unang quarter sa susunod na taon at upang nakahanda na sa oras na kailanganin ng mga mag-aaral bago magsimula ang pasukan.
Dapat sana ay may 22 public schools sa lungsod ang mabebenipisyuhan sa mahigit P457 milyong pondo ng school buildings na inilaan ng departamento ng edukasyon ngayong taon.
Ngunit, paliwanag ni Zarate, base sa validation ng technical personnel ng ahensiya, sa mabebenipisyuhan na public schools ay may apat na paaralan ang nadiskubreng hindi nabigyan ng pondo na nagkakahalaga ng mahigit P70 milyon.
“We are elated that the funds that were earmarked for the school building projects will be released anytime pursuant to the advance notice that was relayed to our office so that we can already start working out the bidding and implementation of the projects to prevent the funds from reverting to the general funds once it will not be released before the end of the year,” ani Zarate.
Paliwanag pa niya na para sa mga paaralang mabebenipisyuhan ng school building fund sa susunod na taon, ang ahensiya katulong ang departamento ng edukasyon ay magsasagawa muli ng validation para sa pagtatala ng mga proyektong nangangailangan ng pondo. Ang validated list ay ipapasa sa central office para sa pagpoproseso ng pondong ipapamahagi mula sa budget department.
Aniya, mahigpit na susubaybayan ng ahensya ang implementasyon ng programa upang ang mga proyekto ay matatapos ayon sa existing standards na masiguro ang kaligtasan ng mga mag-aaral na gagamit.
Malaki ang kumpiyansa ni Zarate na mas marami pang paaralan sa iba’t ibang parte ng lungsod ang mabebenipisyuhan ng proyekto ng pamahalaan upang makatulong na mapaluwang ang iba’t ibang klase at makapagbigay ng sapat na classrooms para sa mga inaasahang pagtaas ng enrolment ng senior high school na nagsimula ilang taon na ang nakararaan.
Ang Department of Education at DPWH ay pumasok sa isang kasunduan para maging tugma ang pagpapatupad sa school building program ng pamahalaan na inaasahang magbubunga ng mas mabilis na implementasyon ng napakaraming proyekto na nakahilera sa pagpapagawa, rehabilitasyon, upgrade at konstruksiyon ng mga school building at classrooms sa iba’t ibang bahagi ng bansa upang matulungang mapabuti ang kalidad ng edukasyon sa implementasyon ng K to 12 basic education program. ABN