P67.8-M pasilidad mula DOH, ilalaan sa 7 ospital sa Pangasinan

LINGAYEN, PANGASINAN – Nakatakdang lagdaan ni Governor Amado Espino III sa susunod na linggo ang Memorandum of Agreement (MOA) kasama ang Department of Health (DOH) na magbibigay ng P67.8 milyong halaga ng pasilidad para sa pitong hospital na pinamamahalaan ng provincial government.
Ang provincial board na pinangungunahan ni Vice Governor Jose Ferdinand Z. Calimlim Jr. ay buong pagkakaisang inaprubahan ang resolusyon na nagpapahintulot kay Espino upang pumasok at pumirma sa MOA.
Lalagdaan ni Espino ang MOA kabilang si DOH Regional Director Myrna Cabotaje para sa implementasyon ng Health Facilities Enhancement Program (HFEP) ng 2017 para sa pitong hospital na pinamamahalaan ng probinsiya ng Pangasinan.
Inihayag naman ni Board Member Jeremy Agerico Rosario ang kumpiyansa nito sa programa upang i-upgrade ang pitong ospital upang magsilbi sa mas maraming pasyente at upang ibigay ang mas magandang serbisyo sa kanila.
Ang pitong hospital ay ang Urdaneta District Hospital, P20 million; Bayambang District Hospital, P6 million; Lingayen District Hospital, P10 million; Asingan Community Hospital, P2 million; Dasol Community Hospital, P11.8 million; Manaoag Community Hospital, P8 million; at Umingan Community Hospital, P10 million.
Ang HFEP ay programa ng DOH na may layong mapabuti at i-upgrade ang health facilities sa rural areas upang sapat na magbigay ng emergency at pangunahing mga serbisyo sa pangangalagang pangkalusugan sa mga tao.
Nabanggit ni Board Member Angel Baniqued Jr. na ang Pangasinan ay isa sa mga benepisyaryo ng HFEP ng tatlong taon.
Inihayag din ni Dr. Cielo Almoite, assistant provincial health officer, na ang pitong ospital ay nakatanggap ng parehong proyekto sa nakaraang taon.
Ang gastos sa pagpopondo bawat hospital, dagdag niya, ay depende sa nakitang kailangan na sinuri ng Provincial Engineering Office (PEO) para sa pag-apruba ng DOH regional office.
Inilunsad ang HFEP ng DOH noong 2008 upang maisaayos ang nationwide government hospital system para sa Health Reform Sector Agenda.
Prayoridad ng pagpopondo ay ang pag-upgrade ng licensing classification at PhilHealth accreditation ng mga government hospitals at expansion ng serbisyo sa mga tertiary hospitals upang magbigay ng mataas na kalidad sa pangangalaga. LEONARDO MICUA, PNA / ABN

Amianan Balita Ngayon