Pagkamatay ng 2 Vietnamese, sisiyasatin ng task force

SUAL, PANGASINAN – Bumuo ang Pangasinan provincial committee on illegal entrants (PCIE) ng isang sub-task group on investigation (STGI) na magsasagawa ng pagsusuri sa kaso ng dalawang bangkay ng mangingisdang Vietnamese at ng limang iba pa na nahuling ilegal na nangingisda sa Cape Bolinao.
Itinalagang task force chairman si Captain Danilo Enopia ng Philippine Coast Guard (PCG) at vice-chairman ang Bureau of Fisheries and Aquatic Resources (BFAR).
Ang mga kasapi ng STGI ay mula sa Philippine Navy (PN), Pangasinan Police Provincial Office (PangPPO), Bureau of Immigration (BI), Department of Justice (DOJ), Department of Foreign Affairs (DFA), at ang Philippine Information Agency (PIA) bilang secretariat.
Sa inisyal na pagpupulong ng task force noong Setyembre 25, ay sinubukan ng mga ito na suriin kung nararapat ang ginawang pagpapaputok ng Navy sa barko ng mga mangingisdang Vietnamese.
Pinanindigan naman ng PN na warning shots lamang ang kanilang ipinaputok at hindi sila nakapatay ng alinman sa mga mangingisda.
Ayon sa ulat ng Navy, tinugis ng kanilang barko ang mga naturang bangkang pangisda nang nagtangka ang mga mangingisda na tumakas.
Sinabi ng tagapagsalita ng task force at PNP Pangasinan Provincial Director Senior Supt. Ronald Lee na isinurender na ng Navy ang kanilang mga armas na binubuo ng 10 piraso ng M-16 rifles at dalawang .50-caliber na baril.
“Sa report ng Philippine Navy ay nagpaputok sila ng warning shots, but hindi pa klaro kung sino o may natamaan o kung nagpaputok din ‘yung sa kabila (fishing vessel) dahil wala tayong nakuhang baril sa kanila,” pahayag ni Lee.
Aniya, ang BRP Miguel Malvar na binubuo ng 49 na crew ay inalis muna sa tungkulin habang hinihintay ang resulta ng imbestigasyon.
Tutukuyin din ng STGI kung gumamit ng excessive force ang Navy, at sa bahagi naman ng mga mangingisdang Vietnamese, kung may nangyari na ilegal na pangingisda at paglabag sa Fisheries Code at Environmental Protection Act lalo na at pinasok ng mga ito ang eksklusibong economic zone ng Pilipinas.
Sa ulat ng pulis, ang mga namatay na mangingisda ay kinilalang sina Le Van Liem at Le Van Reo, dalawa sa pitong mangingisdang lulan ng barko. Ang bangkay ng dalawa na may tama ng bala ay nakita sa deck ng barko.
Ang iba pang mangingisda na sina Pham To (captain), 34; Pahn Lam, 34; Nguyen Thanh Chi, 49; Phan Van Liem, 41; at Nguyen Van Trong, 41, ay nakakulong sa Bolinao police station.
Sa isang emergency task force meeting noong Setyembre 27 ay nagtalaga ng isang interpreter para sa mga mangingisda ang Vietnamese Embassy.
Dumating na rin ang pamilya ng mga namatay na Vietnamese sa Pangasinana. VHS/PIA-Pangasinan / ABN

Amianan Balita Ngayon