Palalu kayo met, awan pay um-umno!

September 30, 2017 Opinion Sirmata ken Tagtagainep ni Mang Gusting

Kayong Angkuan, kakayong, agisem tayo man pay ta di ket nakuretret ti muging tayo a bigbigat. Iti ngamin naminsan, inistorya ti apokok ti maestrada ket daytoy man ti istoryana ania.

Teacher: Adda lima a billit. Pinaltogak ti maysa, manu ti nabati…sungbatam man Juan.
Juan: Awan, Ma’am Melanie.
Teacher: Ania ka kadin, Juan.
Juan: Apay, Ma’am Melanie.
Teacher: Ammom kadi ti agbilang? Pinaltogak ngarud ti maysa.
Juan: Ania kayo met Ma’am, siempre pimmanaw wenno timmayab dagiti kakaduana.
Teacher: Ania?
Juan: Apay, Ma’am Melanie, no pinaltoganda ti kaabaymo, steady ka laeng?
Teacher: Ha?
Juan: Umayka Ma’am. Agtugaw ka ditoy tugaw ko. Siak man ti agisuro!

Wahaaaa…umisem kayo met a Kakayong no dikay agkatawa. Well, well, hellooo, hellooo…naimbag nga oras kadatayo amin kakailian. Addakam manen nga umay maki-abrasa ken makinnistoria ken makinnisem kadakayo babaen iti ABN. Naimbag nga oras kadakayo amin nga awan malabusan este malabsan kunami koma. No dakami met ditoy batugmi a langit, ti kayatyo a maamuan, sus maria kusina, saan a maawatan ti paniempo na. Aggibus ti bulan ti September kakayong ngem anian, matotodo pay laeng. Adda pay ket singin nga LAP na wenno low Pressure Area a bambantayan ti ahensia ti gobierno nga akin-sakup iti daytoy. Anian, bumanerber la ngaruden adda pay la bagyona, kakayong. Sus ina aya, kasanu man ngatan dagitay nasapa a naggapasaen? Pagimbaganna laeng ta saan unay a napigsa dagiti naglabas a bagyo a nangdalapus kadatayo ta no saan, sus, kasanun no dagitoy dua ita ket isuda ti mangdidigra kadatayo. Apo, saan koma a. Ta no kasta ti mapasamak diak la ammon no ania man mapasamaken kadagiti pagay tayo a dandanin magapas ken mulatayo a mais kas kada natnateng.

Adda man inkam dillawen, kailian ket sapay la koma ta addanto makabasa iti daytoy a kolum tayo kadagiti maseknan kasta metten kadagiti madaydayaw wenno honorable a barangay officials iti ayanmi a lugar, kakayong. Ta no agsarsarita tay ammok a Kagawad ket kunam no isun ti kalaingan a barangay official. Nge, pweeee…awan pay uray koma ulila a naaramidna a barangay resolution idi dakami ti agkakadua. Ikarkaritna pay ti kaadda dagiti proyektoda ngem sus ina kakayong, resolutionta pay la dagidiay idi ngem—pasaw a talaga—-ngem ita ania kadi ti aksiyon da maipapan iti maar-aramid a kalsada national, kasta met dagiti narebba a retaining wall ti igid, apay ngay a ti metten naisubli ket existing a pader dagidiay? Ti laeng nakitami ket iti sungadan?

Palalu met daytan no diyo man la aksiyonan, kasta lattan? Awan pay um-umno. Sa ket no agsarsarita dagiti dadduma dita kasla nagadun ti accomplishment da iman. Hay naku, nagadu ketdin a komkombiokong wenno pallaw a tao aya…abusta agay-ayat dagiti dadduma dita nangruna kadagiti ag-graduate-en wenno agpason ti terminoda kas barangay officials ta ma-extend da manen. Kasta met dagitay agpangpanggep nga agpa re-elect nga awanen namnamada a mangabak ta awan met inar-aramid da bayat ti panagtakemna. Ti dakesna, isudan to pay laeng ti mangibaga a nagadun ti naaramidanda ngem uray ulila la koma a proposal para iti barangay wenno kabarangayanda, awan. Palalu kayo a kunami…

Ne, ne, ne, Kakayong, naimasantayo manen a kunak. Isu a baliwantayto manen, a…opsss, aglisika man met iti pagnaak sika Atong. Ania manen ti masapulmo aya? Makalag a numero? Sal-ot ka met, kubrador ka idi kubrador ka pay laeng agingga ita, ala man laengen…sige, kalagem man tay opisyal a duling. Babayooo, tsuptsup muahmuahhh.