Palit-ulo, no way sagot ni Digong

No way! Yan ang mabigat na sagot ni Pres. Duterte sa isyu ng palit-ulo. Ganito yan, pards. Kamakailan, sa pamamagitan  ni Abdullah Maute, tumatayong lider ng mga teroristang Maute na palalayain daw nila ang kanilang mga bihag, kasama si Fr. Chito Suganob kung palalayain din ang kanyang ama na si Cayamora Maute at ina na si Ominta Farhana Maute. Ang mensahe ay ipinadala sa pagtatapos ng Ramadan kamakailan. Maikli at matapang ang sagot ni Pangulong Digong: No way at hindi makikipagnegosasyon ang gobyerno sa mga terorista kahit kailan. In short, hindi kakagatin ng pamahalaan ang ganyang negosasyon. Katunayan nga, ayon kay Presidential Spokesman Ernesto Abella, hindi pumasok sa negosasyon ang pamahalaan hinggil sa walong oras na humanitarian pause o ceasefire noong Ramadan kundi mga religious leaders daw ang nagplano.  Ano ang nangyari? Tuloy din ang bakbakan lalo na nang matapos ang takdang oras. At tiyak namin, habang sinusulat ang espasyong ito, atikabong bakbakan pa rin ang nagaganap sa Marawi. Ibig sabihin, NO WAY ang tigil-bombahan hangga’t may natitirang teroristang kalaban, di ba?

*****

Ang nakakaawa sa ngayon ay ang kalagayan ng mga bihag ng mga Maute-ISIS. Nalalagay sa alanganin ang kanilang buhay. Ang masaklap, hindi lang sa sila’y ginagawang panangga o kaya’y human shields kundi ginagawa pa silang utusan upang magnakaw para sa Maute.  Ang pinakagrabeng ulat ay ang kalagayan ng mga babaeng bihag na ginagawang “sex slaves” o kaya’y sa tagalog: parausan. Husme naman!  Anong klaseng mga hayop ang mga teroristang yan. Yan ang report na nakalap ng mga otoridad kamakailan. Mga bihag din daw ang ginagawang taga-buhat ng mga gamit (baril at bala at pagkain) ng mga Maute. Pero ang pinakamasaklap na eksena ay ang ulat  ng military pagkatapos na kanilang mabawi ang ilang pinagkutahan ng mga terorista – 17-bangkay ng mga hostage ang kanilang narekober, lima rito ay pinagtataga, pinugutan at naa-agnas na. Tsk tsk, tao pa ba ang may gawa nito? Ang bulong ng marami: kaya daw nilang gawin ang mga karumaldumal na yan dahil sa report ng mga otoridad, malamang na gumagamit ng droga ang mga terorista.  Marami na kasing droga ang nasamsam ng mga sundalo mula sa iniwang taguan ng mga Maute kasama na ang mga armas at drogang nakuha sa mga bahay ng ilang naging matataas na opisyal ng Marawi.  Dagdag pa sa ulat ng AFP na arestado rin ang dating Marawi City Mayor na si Fajad Salic dahil sa armas at eksplosibo.  Sinasabi ring si Salic ang  umano’y financier ng Maute-ISIS at ito’y dati ring asawa diumano ni actress Alma Moreno. Haayy buhay nga naman. Ayaw ko nang mangalkal  baka dumami pa ang madadawit. Baka pati pusa at aso nila, pusher na rin.

******

Tama lang, ika ng nakararami, na huwag pumayag sa palit-ulo. Ang dapat, ang ulo ng mga terorista ang kunin at panagutin sa kanilang krimen.  Dapat ding iligtas lahat ng bihag at maging saksi kontra sa mga terorista. Una sa lahat, may kinakaharap na mga kasong kriminal ang ama at ina ng mga Maute kaya walang dahilan upang sila’y palayain. Kung hindi maubos ang kanilang puwersa, tiyak hindi matitigil ang mga karahasan sa buong Mindanao at buong bansa.  Kaya ang tanong kung kailan matatapos ang Martial Law sa Mindanao, mahirap pang sagutin sa ngayon. Nakasandal ito sa timbangan ng mga nangyayari sa ngayon at bukas.  Sumama na lang tayong manalangin na sana’y  matapos na ang krisis sa lalong madaling panahon at muling bumangon at magsimula. Adios mi amor, ciao, mabalos.

Amianan Balita Ngayon